کاروان یاروەیس: جێبەجێنەکردنی تەوتین کێشەی مووچەی قوڵترکردوەتەوە

PUKMEDIA

کاروان یاروەیس

بڕیاردەری فراکسیۆنی یەکێتی دەڵێت: "رادەستنەکردنی داهاتی نانەوتی لەلایەن هەرێم و جێبەجێنەکردنی تەوتین کێشەی مووچە قوڵتردەکاتەوە"، هاوکات رونکردنەوەیەکیش لەبارەی بەرەو کۆتایی هاتنی کارەکانی تەوتینی مووچەی هەرێم بڵاودەکاتەوەو رایدەگەیەنێت: "چاودێری دارایی عیراق مەبەستیان هەژماری منە نەک تەوتینی مووچە و میدیاکانی کوردستان کەوتونەتە هەڵەوە، دەبێت حکومەتی فیدراڵ بڕیاری راشكاوی خۆی بۆ تەوتین بدات".

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بە PUKMEDIA ی راگەیاند: "چارەسەرنەکردنی کێشەی رادەستنەکردنی داهاتی نانەوتی و جێبەجێنەکردنی تەوتین، وا دەکەن کێشەی مووچە لەمە قووڵتر بێتەوە، رەنگە تا ڕادەی راوەستاندنی تەمویلی مووچەش بڕوات، لەسەر حکومەتی هەرێمە بە داهاتی نانەوتی و نەوتی فرۆشراو کورتهێنانی مووچە پڕبکاتەوەو بەرپرسیاری یەکەمی کیشەی مووچەخۆران، حکومەتی هەرێم و بەغدایە".

"وەک فراکسیۆنی یەکێتی سوورین لەسەر جێبەجێ کردنی بڕیاری دادگای فیدراڵی لەبارەی تەوتین و بۆ ئەو مەبەستەش ئیمزای 150 پەرلەمانتارانی عێراق و سەرۆکی فراکسیۆنە کوردستانیەکانمان رادەستی محەمەد شیاع سودانی سەرۆک وەزیرانی عیراق کردووە"، کاروان یاروەیس وای وت.

لەلایەکی تریشەوە دەڵێت: "قسەکانی چاودێری دارایی فیدراڵ کە گوایە (٨٠٪) کارەکانی تەوتینی مووچەی هەرێم تەواوبووە، لەمیدیاکانی کوردستان بەهەڵە لێکدرایەوە، ئەوان مەبەستیان (هەژماری من)ە نەک تەوتینی راستەقینە، چونکە هێشتا نە حکومەتی فیدراڵ بڕیاری یەکجارەکی داوەو نە حکومەتی هەرێمیش دەستبەرداری «هەژماری من» بووەو نەهیچ لقێکی بانکە فیدراڵییەکان لە شارەکانی هەرێم کراوەتەوە، دەشبێت حکومەتی فیدراڵ بڕیاری راشکاو و روونی خۆی بدات لەبارەی تەوتینەوە".

PUKMEDIA