لەسلێمانی خۆپیشاندان بۆ مووچە دەستیپێکرد

PUKMEDIA

خۆپیشاندان

سەرلەبەیانی ئەمڕۆ ٧-١٢-٢٠٢٤ بۆ جێبەجێکردنی تەوتین و دواکەوتنی مووچەکانیان، مامۆستایان و بەشێک لەفەرمانبەران لەبەردەم پەروەردەی رۆژئاوا بەمەبەستی خۆپیشاندان و ناڕەزایەتی دەربڕین گردبوونەوەو شەقامەکەیان داخست.

بەپێی زانیارییەکانی PUKMEDIA مامۆستایان و فەرمانبەرانی ناڕازی داوا لەحکومەتی هەرێمی کوردستان و بەرپرسانی دەکەن تەوتین جێبەجێبکەن و مووچەی مانگەکانی (١٠ و ١١ و ١٢) پێکەوە دابەشبکەن و لەوە زیاتر مووچە دوانەخەن.

هاوکات مامۆستایەکی ناڕازی دەڵێت:"کابینەی ٩ بەدیاریکراوی کابینەیەکی شکستخواردووە و سەرۆکایەتی ئەم کابینەیە کارەساتی خوڵقاندووە لەناو هەرێمی کوردستاندا و ژیانی تاک بەتاکی تێکداوە، بۆیە هەموو رێکارێک لەدژیان دەگرینە بەرو لێیان قبوڵناکەین"، هاوکات مامۆستایان و فەرمانبەرانی ناڕازی داواش دەکەن تەوتین جێبەجێکرێت.

ئەمەش لەکاتێکدایە هه‌فته‌یه‌كه‌ وه‌زاره‌تی دارایی عیراق 763 ملیار دیناری خستووه‌ته‌ سه‌ر هه‌ژماری دارایی هه‌رێم، به‌ڵام حكومه‌تی هه‌رێم به‌ بیانوی كورتهێنانی مووچه‌، هێشتا لیستی مووچه‌ی مانگی 10 ی رانه‌گه‌یاندووه‌، له‌كاتێكدا كورتهێنانی ئەم مانگه‌ بڕ‌ی 250 ملیار دیناره‌.

به‌پێی زانیارییه‌كانی وه‌زاره‌تی دارایی هه‌رێم، داهاتی نانه‌وتی هه‌رێم مانگانه‌ی 300 ملیار دیناره‌، هاوكات به‌پێی به‌دواداچوونه‌كانی PUKMEDIA، حكومه‌تی هه‌رێم بۆ پڕ‌كردنه‌وه‌ی كورتهێنانی مووچه‌ ده‌توانێت پشت به‌داهاتی ناوخۆ ببه‌ستێت، له‌كاتێكدا سۆران عومه‌ر ئه‌ندامی په‌رله‌مانی عیراق بۆ كه‌ناڵه‌كانی راگه‌یاندن رایگه‌یاندبوو:" حكومه‌تی هه‌رێم داهاتی 6 مانگی ره‌وانه‌ی عیراق نه‌كردوه‌ كه‌ بڕ‌ه‌كه‌ی ده‌گاته‌ زیاتر له‌ 1 ترلیۆن و 800 ملیار دینار".

PUKMEDIA