وتەبێژی کۆمسیۆن: تۆمارکردن و دابەشکردنی کارتی دەنگدان دەستپێدەکاتەوە

PUKMEDIA

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق بڕیاریدا تۆمارکردن و دابەشکردنی کارتی بایۆمەتری دەنگدان لەپارێزگاکانی هەرێمی کوردستان دەستپێبکاتەوە.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" بەبڕیاری ئەنجومەنی کۆمسیاران تۆمارکردنی کارتی بایۆمەتری دەنگدان لەماوەیەکی نزیکدا لەپارێزگاکانی هەرێمی کوردستان دەستپێدەکاتەوە".

"ئەو کەسانەشی لەهەڵبژاردنی رابردووی پەرلەمانی کوردستاندا پەنجەمۆرەکانیان نەیخوێندووەتەوە دووبارە پەنجەمۆریان لێوەردەگیرێتەوە و ئەو کێشەیەش چارەسەر دەکرێت"

وتەبێژی کۆمسیۆنی باڵای سەربەخۆی هەڵبژاردنەکانی عیراق راشیگەیاند:"ئەنجومەنی کۆمسیاران بڕیاریداوە لەڕۆژانی داهاتوودا دەست بەدابەشکردنی کارتی بایۆمەتری دەنگدان لەپارێزگاکانی هەرێم بکرێتەوە".

ئەمەش لەکاتێکدایە بەبڕیاری کۆمسیۆن پێش هەڵبژاردنی پەرلەمانی کوردستان کە رۆژی ٢٠-١٠-٢٠٢٤ ئەنجامدرا، تۆمارکردن و وەرگرتنەوەی کارتی بایۆمەتری دەنگدان راگیرابوو، لەئێستاشدا بەبڕیاری ئەنجومەنی کۆمسیاران دووبارە هەردوو پرۆسەکە دەستپێدەکاتەوە.

PUKMEDIA