پەرلەمانتارێکی یەکێتی: موڵک و ماڵ دەگەڕێنینەوە بۆ خاوەنەکانیان

PUKMEDIA

هۆڵی کۆبوونەوەی ئەنجومەنی نوێنەرانی عیراق

بڕیارە ئەمڕۆ ئەنجومەنى نوێنەرانى عیراق  بۆ دەنگدان لەسەر سێ پرۆژەیاسا کە چەندجارێک دواخراوە و ناکۆکیان لەسەرە کۆببێتەوە، ئەندامێکی  ئەنجومەنەکەش دەڵێت:" چاوەڕوان دەکرێت لە کۆبوونەوەکەدا هەرسێ پرۆژە یاساکە دەنگی لەسەر بدرێت، چونکە گرێدراوی یەکن و لەلایەن پێکهاتەکانەوە پێشکەشکراون".

سەباح شێخ حەبیب ئەندامی ئەنجوومەنی نوێنەرانی عیراق لە فراکسیۆنی یەکێتی بە وێبسایتی رەسمی یەکێتیی نیشتمانیی کوردستان PUKMEDIA رایگەیاند:"چاوەڕوان دەکرێت لە کۆبوونەوەی ئەمڕۆی ئەنجومەنی نوێنەراندا هەرسێ پرۆژە یاسای گەڕانەوەی موڵک و ماڵ بۆ خاوەنەکانیان و هەمواری باری کەسی ولێبووردنی گشتی دەنگی لەسەر بدرێت."

"یەکێتی هەر لە سەرەتای دامەزراندنی حکومەتی نوێی عیراق داوای کردووە بڕیارەکانی قیادە سەورە هەڵبوەشێندرێتەوە، کە بەهۆیەوە خەڵکێکی زۆر زەرەرمەندبوون لە ئێستاشدا پرۆژەکە لە پەرلەمانە و هەوڵی زۆرمان لەگەڵ لایەنەکان داوە تاوەکو دەنگ لەسەر ئەو پرۆژەیە بدرێت"، سەباح شێخ حەبیب وایوت.

ئەو ئەندامەی ئەنجومەنی نوێنەران راشیگەیاند :" چاوەڕوان دەکرێت لە کۆبوونەوەی ئەنجومەنی نوێنەراندا هەرسێ پرۆژە یاساکە دەنگی لەسەر بدرێت، چونکە گرێدراوی یەکن و لەلایەن پێکهاتەکانەوە پێشکەشکراون".

یەکێتیی نیشتمانیی کوردستان هەر لەسەرەتای پێکهێنانی کابینەی نوێی حکومەتی عیراق هەوڵیداوە بڕیارەکانی قیادەی سەورە هەڵوەشێنێتەوە و ماف بۆ مافخوراوان لەناوچە جێناکۆکەکان بگەڕێنێتەوە، لە ئێستاشدا ئەو پرۆژەیەی یەکێتی لەپەرلەمانە و هەوڵی تێپەڕاندنی دەدات لایەنە کوردستانییەکانیش پشتیوانی پرۆژەکە دەکەن.

ئەمەش لەکاتێکدایە بەپێی کارنامەى کۆبوونەوەکەی ئەمڕۆ 1-12-2024 بڕیارە دەنگ لەسەر پرۆژەیاسای هەموارى باری کەسیی ژمارەی 188ـی ساڵی 1959  کە فراکسیۆنە شیعەکان پشتیوانى دەکەن و پرۆژەیاسای گەڕاندنەوەی موڵک و ماڵ بۆ خاوەنەکانیان، کە فراکسیۆنە کوردستانییەکان پشتیوانى دەکەن، هاوکات پرۆژەیاسای هەمواری دووەمی یاسای لێبوردنی گشتی دەنگی لەسەر بدرێت.

PUKMEDIA