کارنامەی یەکەم دانیشتنی خولی نوێی پەرلەمان بڵاودەکرێتەوە

ئەرشیف

هۆڵی دانیشتنی پەرلەمان

رۆژی 26ـی 6ـی 2024 سەرۆکی هەرێم بڕیاری لەسەر یەکەم کۆبوونەوەی خولی شەشەمی پەرلەمانی کوردستاندا و داوای لە کاندیدە دەرچووەکان کرد رۆژی 2ـی 12ـی 2024 لە پەرلەمان ئامادەبن بۆ یەکەم کۆبوونەوەی خولی نوێی پەرلەمانی کوردستان.

دوای بڕیارەکە ئەمڕۆ 30ـی 11ـی 2024 ، بەرنامەی یەکەم دانیشتنی خولی شەشەمی پەرلەمانی کوردستان، لەلایەن سەرۆکی دیوانی پەرلەمانەوە بڵاوکرایەوە، بەپێی کارنامەکە دانیشتنەکە بەچەند ئایەتێک لەقورئانی پیرۆز و ساتێک وەستان بۆ گیانی پاکی شەهیدان دەستپێدەکات، دواتر بەتەمەنترین کاندیدی سەرکەوتوو لەلایەن سەرۆکی دیوانی پەرلەمانەوە بانگهێشت دەکرێت بۆ سوێندخواردن و بەڕیوەبردنی دانیشتنەکە.

هەر بەپێی کارنامەکە سەرجەم کاندیدە سەرکەوتووەکان بانگهێشت دەکرێن تاوەکو سوێندی یاسایی بخۆن.

پێشتریش دڵشاد شەهاب وتەبێژی سەرۆکایەتی هەرێمی کوردستان لە کۆنگرەیەکی رۆژنامەوانیدا رایگەیاند: "نێچیرڤان بارزانی سەرۆکی هەرێمی کوردستان بەپێی ئەو دەسەڵاتەی پێیدراوە، بڕیاریدا رۆژی 2ـی 12ـی 2024، یەکەم کۆبوونەوەی خولی شەشەمی پەرلەمانی کوردستان ئەنجام بدرێت".

یەکێتیی نیشتمانیی کوردستان لە هەڵبژاردنی خولی شەشەمی پەرلەمانی کوردستاندا کە رۆژی 20ـی 10می 2024 بەڕێوەچوو، توانی 23 کورسی پەرلەمان بەدەستبهێنێت، کە لە بازنەی سلێمانی 15 کورسی و لە بازنەی پارێزگای هەولێر 6 کورسی و لە بازنەی دهۆک 1 کورسی و لە پارێزگای هەڵەبجەش 1 کورسی بوو.

PUKMEDIA