200 دەزگاو ناوەند لەشەشەمین پێشانگای نێودەوڵەتی كتێب لەسلێمانی دەبن

شەشەمین پێشانگای نێودەوڵەتی كتێب لەسلێمانی

شەشەمین پێشانگای نێودەوڵەتی كتێب لەسلێمانی

رۆژی 28-11-2024، بەبەشداری 200 دەزگاو ناوەندی ناوخۆیی و وڵاتان شەشەمین خولی پێشانگای نێودەوڵەتی سلێمانی بۆ كتێب دەكرێتەوەو ماوەی 11 رۆژ بەردەوام دەبێت و دەیان هەزار ناونیشانی تێدا نمایش دەكرێت،  بەڕێوەبەری راگەیاندنی چاپ و بڵاوكردنەوەی سلێمانیش دەڵێت: "پێشانگاكەی ئەمساڵ جیاوازە".

ئەریوان سیوەیلی بەڕێوەبەری بەڕێوەبەرایەتی راگەیاندن و چاپ و بڵاوكردنەوەی سلێمانی بەوێبسایتی رەسمیی یەكێتیی نیشتمانیی كوردستان PUKMEDIA ی راگەیاند: "رۆژی 28-11-2024، شەشەمین خولی پێشانگای نێودەوڵەتی سلێمانی بۆ كتێب، لەسلێمانی دەكرێتەوەو تاوەكو 8-12-2024 واتا بۆ ماوەی 11 رۆژ بەردەوام دەبێت و دەیان هەزار ناونیشانی تێدا نمایش دەكرێت، هاوكات 200 دەزگاو ناوەندی ناوخۆیی و وڵاتان بەشداری تێدا دەكەن".

"لەپێشانگاكەدا شوێنێك تایبەتكراوە بە بۆردی راگەیاندن و هۆشیاری یەكێتیی نیشتمانیی كوردستان و تێیدا مێژووی نووسین و رۆژنامەوانی و شۆڕشی نوێ و ئەرشیفی یەكێتی لەشۆڕش و ژمارەی كتێب و نوسەران و بڵاوكراوەكانی شاخی تێدا نمایش دەكرێت، كەنزیكەی (1000) ناونیشانی جیاواز لەكتێب و گۆڤاری ئۆرگانەكانی یەكێتی تێدايە، لەوانە كتێبەكانی بۆردی راگەیاندن و بۆردی هۆشیاری و مەڵبەندی دیراسات و ناوەندی كاروباری یاسایی و دامەزراوەی سەرۆك جەلال تاڵەبانی، هاوكات بەرهەمی تێكۆشەرانی یەكێتی و بیرەوەری و یاداشتی سیاسەتمەدارانی شۆڕشی نوێ"، ئەریوان سیوەیلی وادەڵێت.

راشیگەیاند: "لەپێشانگاكەدا چەند پانێڵێك لەبوارە جیاوازە ئەدەبییەكاندا پێشكەش دەكرێن و پێشبینیش دەكەین ژمارەی سەردانیكەرانی پێشانگاكەو فرۆشی كتێب لەساڵانی رابردوو زیاتر بێت و كاریگەری لەسەر زۆربوونی رێژەی خوێنەر هەبێت". 


بەڕێوەبەری بەڕێوەبەرایەتی راگەیاندن و چاپ و بڵاوكردنەوەی سلێمانی وتیشی: " شەشەمین خولی پێشانگای نێودەوڵەتی سلێمانی بۆ كتێب، ئەمساڵ جیاوازەو ناوی راڕەوەكان تایبەت كراون بەناوی كەسایەتی و نوسەران و ئەدیبانی كورد لەچوار پارچەی كوردستان، هاوكات گرنگی تایبەت بەمنداڵان دراوەو شوێنی چالاكیان بۆتەرخانكراوە، ستەیجێكی تایبەتیش بەنووسەران ئامادەكراوەو  دەتوانن لەسەر ئەو ستەیجە كتێبەكانیان بناسێنن و بەئیمزای خۆیانەوە پێشكەشی خوێنەرانی بكەن".

هەرچەندە بڕیاربوو رۆژی 20-11-2024، شەشەمین پێشانگای كتێب بەڕێوەبچێت، بەڵام بەهۆی پڕۆسەی سەرژمێری گشتی عیراقەوە لەڕۆژانی 20 و 21ی ئەم مانگە، بڕیاردرا پێشانگاكە بۆ 28 ی مانگ دوابخرێت و بۆماوەی 11 رۆژ بەردەوامبێت.

PUKMEDIA

‎