ستران عەبدوڵڵا: تەنها لەسلێمانی پڕۆسەی سیاسی هەیەو فشاريشی لەسەرە

PUKMEDIA

ستران عەبدوڵڵا ئەندامی سەركردایەتی یەكێتیی نیشتمانیی كوردستان

ستران عەبدوڵڵا ئەندامی سەركردایەتی یەكێتی رایدەگەیەنێت: "لەكوردستان سیاسەتێكی كوردستانی تەواومان نییە، بەڵكو تەنها لەسلێمانی پڕۆسەی سیاسی هەیەو بەهۆیەوە فشارێكی زۆر لەسەر شارەكەیە، بەپێچەوانەوە هەولێرو بادینان دیزاینێكی سیاسی تایبەتیان بۆ كراوە، بۆیە هیوادارین هەموو كوردستان لەڕووی سیاسییەوە ببێت بەسلێمانی نەك بەپێچەوانەوە".


ستران عەبدوڵڵا ئەندامی سەركردایەتی یەكێتیی نیشتمانیی كوردستان لەپەڕەی تایبەتی خۆی لە فەیسبوك نوسیویەتی: "سێ ساڵ پێش ئێستا رامگەیاند: "لۆد لەسەر سلێمانی هەیە، چونكە لەكوردستان سیاسەتێكی كوردستانی تەواومان نییە، واتا كوردستان چەند زۆنێكەو كەركوك-یش بەجیا زۆنێكە، هاوكات لەكوردستان دەسەڵات دابەشبووە بەسەر هێزە سیاسییەكاندا لەناوچە جوگرافییە جیاجیاكاندا".

دەشڵێت: "ئەم دابەشبوونە بەجۆرێكە لەزۆنی زەرد كەزۆنی دەسەڵاتی پارتییە، بادینان جیاوازە لەهەولێر، لەزۆنی سەوزیش كە بەزۆنی دەسەڵاتی یەكێتی ناودەبرێت حزبەكانی دیكە شەریكی یەكێتین تێیدا".

راشیدەگەیەنێت: "هەربۆیە دەڵێین تەنها لەسلێمانی پڕۆسەی سیاسی هەیەو بەهۆیەوە فشارێكی زۆر لەسەر شارەكەیە، چونكە لەهەولێرو بادینان پڕۆسەی سیاسی داخراوەو ناڵێن پارتی دیموكراتی كوردستان بەتەواوی دیكتاتۆرە، بەڵام یارمەتی هیچ چالاكییەكی سیاسی لەو زۆنە نادات و دیزاینێكی سیاسی تایبەتی بۆ كردووە".

ستران عەبدوڵڵا دەشڵێت: "پڕۆسەی سیاسی لەسلێمانی بەشێوەیەك بارگاوی كراوە كەهەموو كەسو لایەنەكان لەسلێمانی دەڵێن (بابڕوخێ، بابژی)، بەڵام ئەمە یارمەتی گۆڕانكاری سیاسی گەورە لەكوردستان نادات، بۆیە هیوادارین پڕۆسەی سیاسی لەسلێمانییەوە بۆ هەموو كوردستان بگوازرێتەوەو هەموو كوردستان لەڕووی سیاسییەوە ببێت بەسلێمانی نەك بەپێچەوانەوە".

PUKMEDIA