بكوژی دایكو دوو منداڵەكەی بەغدا لەسلێمانی دەستگیركرا

ئاسایش

لۆگۆی ئاسایش

بەڕێوەبەرایەتی گشتی ئۆپراسیۆنەكانی ئاسایش، بكوژی هاوسەر و دوو منداڵەكەی ناوچەی دۆرەی بەغدای لەسلێمانی دەستگیركرد.

لەڕاگەیەندراوێكی بەڕێوەبەرایەتی گشتی ئۆپراسیۆنەكانی ئاسایش، كە كۆپییەكی بۆ PUKMEDIA نێردراوە راگەیەندراوە: "رۆژی ٢٠٢٣/١٢/٣١ لە ناوچەی دۆرەی شاری بەغدا تۆمەتبار (مەروان تاڵب حەسەن) بەهۆی كێشەی كۆمەڵایەتییەوە هاوسەرەكەی بەناوی (بان عەبدوڵڵا حەسەن) و دوو منداڵی هاوسەرەكەی بەناوەكانی (ئەیمان) و (یونس) بەچەكی جۆری (دەمانچە) دەكوژێت و تۆمەتبار دوای رووداوەكە لەبەغدا چەند ناسنامەیەكی ساختە دروستدەكات و خۆی لەهێزە ئەمنییەكانی عیراق حەشار دەدات و دواتر بەرەو هەرێمی كوردستان هەڵدێت".

ئاماژە بەوەشدراوە: "دوای بەدواداچوون و لێكۆڵینەوەكانی دەزگای ئاسایشی هەرێم لەسەر رەزامەندی دادوەری لێكۆڵینەوەی ئاسایش توانیان شوێنی خۆحەشاردانی تۆمەتبار دەستنیشان بكەن و بەچەند ناسنامەیەكی ساختەوە لە یەكێك لەهۆتێلەكانی شاری سلێمانی خۆی حەشاردابوو، لەلایەن بەڕێوەبەرایەتی گشتی ئۆپراسیۆنەكانی ئاسایش لە ٢٠٢٤/١١/١٠ دەستگیركرا".

ئەوەشخراوەتەڕوو: "لەئێستادا پەڕاوی لێكۆڵینەوە بۆ تۆمەتباری رووداوەكە كراوەتەوە لێكۆڵینەوەكان بەردەوامن".

PUKMEDIA