سەعدی پیرە: سەرژمێری پرسێکی نەتەوەییە و حزبیی نییە

ئاژانسەکان

سەعدی ئەحمەد پیرە وتەبێژی یەکێتیی نیشتمانیی کوردستان

سەعدی ئەحمەد پیرە رایدەگەیەنێت:" داوا لە هەموو هاووڵاتیانی ناوچە کێشە لەسەرەکان دەکەم لە رۆژی ١٨ و ١٩ی ئەم مانگەوە بگەڕێنەوە ناوچە رەسەنەکانی خۆیان و بەشداری سەرژمێری بکەن، پاشەڕۆژی ناوچە کێشە لەسەرەکان نەدەنە دەست قەدەر، دڵنیاشتان دەکەمەوە سەرژمێری پەیوەندی بە هیچ حزب و لایەنێکەوە نییە".

سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند:" لەچەند رۆژی داهاتوودا پرۆسەی سەرژمێری لەهەرێمی کوردستان بەڕێوەدەچێت، سەرەڕای ئەوەی پێمان وابووە سەرژمێری دوای جێبەجێکردنی ماددەی ١٤٠ سەرژمێرییەکی بێگەرد دەبێت ، بەڵام داوا لە هەموو هاووڵاتیانی ناوچە کێشە لەسەرەکان دەکەم لە رۆژی ١٨ و ١٩ی ئەم مانگەوە بگەڕێنەوە ناوچە رەسەنەکانی خۆیان و بەشداری سەرژمێری بکەن، پاشەڕۆژی ناوچە کێشە لەسەرەکان نەدەنە دەست قەدەر، دڵنیاشتان دەکەمەوە سەرژمێری پەیوەندی بە هیچ حزب و لایەنێکەوە نییە".

هەر لە کۆنگرەکەدا وتەبێژی یەکێتی ئاماژەی بەوەشکرد:"سەرژمێری لە ٢٠ ی مانگ لەو ناوچە کێشەلەسەرانەی ماددەی ١٤٠ دەیانگرێتەوە ئەنجام دەدرێت، بەڵام بڕیارێک هەیە تاوەکو بەدواداچوونی ورد بۆ ئەو کەسانە نەکرێت کە تۆمارکراون ئایا دانیشتوانی رەسەنی ناوچەکەن یان نا رێژەکەی بڵاوناکرێتەوە، هاوکات سەرژمێری بابەتێکی نەتەوەیی و نیشتمانیی و گشتگیرە و ئەوەی بە ئاگر و ئاسن نەتوانرا بکرێت، ئەمڕؤ بە پرۆسەیەکی دیموکراسی ئەنجام دەدرێت".

پیرە:قەرەبووی خەڵک بکەینەوە

سەبارەت بە پێکهێنانی حکومەت و بەڕێوەچوونی هەڵبژاردن و ئەنجامەکان لەهەرێمی کوردستان سەعدی پیرە وتی:" پێویستە بە زووترین کات حکومەت پێکبهێنرێت بزانین چ گۆڕانکارییەک دەکەین لەکابینەی داهاتوودا چۆن خزمەتی خەڵک بکەین و کەموکوڕییەکانی رابردوویان بۆ قەرەبوو بکەینەوە، خۆشحاڵین بەشداریکردنی ئەمجارەی دەنگدەران لە هەڵبژاردن رێژەی پێوانەیی تێپەڕاند، بەجۆرێک سەرەڕای گلەیی و کەموکوڕییەکان هاووڵاتیان جارێکی دیکە متمانەیان بەخشییەوە بەلایەنەکان".

 PUKMEDIA