سەرۆکوەزیرانی عیراق سەردانی هەولێر و سلێمانی دەکات

PUKMEDIA

محەمەد شیاع سودانی سەرۆکوەزیرانی عیراق

محەمەد شیاع سودانی سەرۆك وەزیرانی عیراق سەردانی هەرێمی كوردستان دەكات و پرسی موچە و بودجە، سەرژمیری گشتی، هەناردەکردنی نەوت و کێشە چارەسەرنەکراوەکانی دیکەی نێوان هەولێر و بەغدا لە کارنامەی گفتوگوکانی سەردانەکەیدا دەبن.

سەرچاوەیەكی  ئاگادار لە بەغدا کە نەیویست ناوی ئاشکرا بکەین، بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" سەرۆک وەزیرانی عیراق جگە لەوەی لەگەڵ لێپرسراوانی حکومی کۆبوونەوەی دەبێت، بڕیاریشە سەردانی سلێمانی بکات و لەگەڵ بافڵ جەلال تاڵەبانی سەرۆکی یەکیتی نیشتمانیی کوردستان کۆببێتەوە".

بەوتەی سەرچاوەکە:"تەوەری ئەو سەردانەی سەرۆکوەزیران، پەیوەستە بە گفتوگۆکردن لەبارەی بابەتە سەرەکییە سیاسیی و حکومیەکانی نێوان هەولێر و بەغدا بەتایبەتی پرسی هەناردەکردنەوەی نەوت، کێشەی بودجە و مووچە، سەرژمێری گشتی عیراق و چەند تەوەرێکی دیکەی رۆژ".

 سبەینێ محەمەد شیاع سودانی سەردانی هەولێری پایتەختی هەرێمی كوردستان دەكات و لەگەڵ لێپرسراوانی باڵای حكومەتی هەرێم تاوتوێی دەرئەنجامی هەڵبژاردنی پەرلەمانی كوردستان و پێكهێنانی كابینەی نوێی حكومەتی هەرێم و پرسەكانی موچە و بودجە و دەستپێكردنەوەی هەناردەی نەوت دەكات.

بەگوێرەی زانیارییە میدیاییەکان کە لەبارەی ئەو سەردانەوە چەند رۆژێکە بڵاودەکرێنەوە، سەردانەکەی سەرۆکوەزیرانی عیراق سبەینێ 13/11/2024 دەستپێدەکات.

PUKMEDIA