یاد نەقشبەندی: دروستكردنی هیوای گەورە دواكەوتن قبوڵناكات

PUKMEDIA

دكتۆر یاد نەقشبەندی بەڕێوەبەری نەخۆشخانەی هیوا

داوا دەكرێت بەردی بناغەی نەخۆشخانەی هیوای گەورە كەتایبەتە بەچارەسەركردنی نەخۆشی شێرپەنجە لەسلێمانی دابنرێت، بەڕێوەبەری نەخۆشخانەكەش دەڵێت: "زیاتر لەشەش مانگە لەكۆبوونەوەی ئەنجومەنی سندوقی شێرپەنجە، بڕیار لەدانانی بەردی بناغەی دراوە، بەڵام حكومەت نەیخستووەتە بواری جێبەجێ كردنەوە، لەكاتێكدا زەوییەكەی بۆ دابینكراوە".

دەشڵێت: "نزیكەی چوار ساڵە سەرجەم دەرمان و  پێداویستییەكانی نەخۆشخانەی هیوا بەداهاتی سلێمانی بەڕێوەچووەو حكومەت هیچ هاوكارییەكی نەكردووە".

 
دكتۆر یاد نەقشبەندی بەڕێوەبەری نەخۆشخانەی هیوا لەكۆنگرەیەكی رۆژنامەوانیدا رایگەیاند: "لەگەڵ ئەوەی لەسەر ئەركی خێرخوازان لەماوەی رابردوودا نەخۆشخانەی هیوا نوێكراوەتەوە، بەڵام نەخۆشخانەكە توانای نییە زیاتر لەپێویستی خزمەتی ئەو ژمارە زۆرەی نەخۆش بكات".

حكومەت رێز لەكۆنووسی ئەنجومەنی سندوقی شێرپەنجە بگرێت

"داواكارین حكومەتی هەرێم رێز لەكۆنووسی كۆبوونەوەی ئەنجومەنی سندوقی شێرپەنجە بگرێت، كەزیاتر لەشەش مانگ پێش ئێستا بڕیاری داوە بەردی بناغەی نەخۆشخانەی هیوای گەورە لەسلێمانی دابنرێت و بۆ ئەوەش بڕیاردراوە لیژنەیەك بۆ ئەو مەبەستە سەردانی نەخۆشخانەی هیوا بكەن، بەڵام تائێستاو دوای شەش مانگ هێشتا لیژنەكە نەهاتوونەتە سلێمانی" دكتۆر یاد نەقشبەندی وادەڵێت.

لەنێوان نەخۆشخانەیەكی هەولێرو هیوا جیاكاری كرا

راشیگەیاند: "دانانی بەردی بناغەی نەخۆشخانەی 200 قەرەوێڵەیی لەهەولێر جێی دەستخۆشییە، بەڵام بەپێی بڕیاری ئەنجومەنی سندوقی شێرپەنجە پێویست بوو سەرەتا بەردی بناغەی نەخۆشخانەی هیوای گەورە لەسلێمانی دابنرێت، بەڵام جیاكاری كرا".

12 دۆنم زەوی بۆ هیوای گەورە تەرخانكراوە

بەڕێوەبەری نەخۆشخانەی هیوا ئاماژەی بەوەشكرد: "بۆ دروستكردنی نەخۆشخانەی هیوای گەورە لەسلێمانی بەسوپاسەوە لەلایەن شارەوانی سلێمانییەوە، روبەری 12 دۆنم زەوی لەنزیك پاركی هەواری شار بۆ نەخۆشخانەكە تەرخانكراوەو هیچ بیانوویەك بۆ دانەنانی بەردی بناغەكەی نەماوە".

هیوا پێشەنگی نەخۆشخانە حكومییەكانی شێرپەنجەیە لەعیراق 

وتیشی: "لەماوەی رابردوودا توانیومانە ئامێرێكی زۆر پێشكەوتوو بۆ پشكنینی جینی نەخۆشانی شێرپەنجە بكەین و دڵنیابینەوە كەئایا نەخۆشەكە پێویستی بەتیشك هەیە وەك چارەسەر یاخود نا، بەمەش نەخۆشخانەی هیوا دەبێتە تاكە نەخۆشخانەی حكومی شێرپەنجە لەعیراق كە ئەو پشكنینەی تێدا ئەنجامبدرێت".

دانانی بەردی بناغەی هیوای گەورە لەوە زیاتر دوانەخرێت

دكتۆر یاد نەقشبەندی بەڕێوەبەری نەخۆشخانەی هیوا ئاماژەی بەوەشكرد: "لەئێستادا نەخۆشخانەی هیوا هیچ قاوشێكی چۆڵی نەماوەو سەرجەمیان نەخۆشیان تێدایە، بۆیە دانانی بەردی بناغەی هیوای گەورە لەسلێمانی بووەتە ئەمری واقع و ناكرێت لەوە زیاتر دوابخرێت، لەكاتێكدا نەخۆشخانەكە خزمەت بەسەرجەم گەلی عیراق دەكات و بەپێی ئامارەكان ئەو نەخۆشانەی سەردانی نەخۆشخانەكەمان دەكەن تەنها 26% بۆ 30% ی نەخۆشی پارێزگای سلێمانین و زیاتر 70% یان نەخۆشی پارێزگاكانی دیكەی كوردستان و عیراقن".

حكومەت یەك دینار هاوكاری نەخۆشخانەكەی نەكردووە

لەبارەی مامەڵەی حكومەتی هەرێمیش لەگەڵ نەخۆشخانەكە دكتۆر یاد نەقشبەندی رایگەیاند: "بەراورد بەو خزمەتەی هیوا دەیكات بەدەمەوە هاتنی حكومەتی هەرێم لاوازەو نزیكەی چوار ساڵە سەرجەم دەرمان و پێداویستییەكانی نەخۆشخانەكە لەسەر داهاتی سلێمانی بووەو حكومەتی هەرێم یەك دینار هاوكاری نەكردووە، هاوكات ئەو پارانەشی خەرجنەكردووە كە لەلایەن حكومەتی فیدراڵەوە بۆ نەخۆشخانەكانی شێرپەنجە تەرخان كراون".

نەخۆشخانەی ھیوا لە ساڵی 2007 لە شاری سلێمانی كراوەتەوە كەسەنتەرێكی تایبەتە بە چارەسەركردنی ھەموو جۆرەكانی شێرپەنجەو سەرجەم خزمەتگوزارییە تەندروستییەكان بۆ نەخۆشخانەكان بێ بەرامبەرە، لەڕووی خزمەتگوزاری پزیشكی و ئاستی بەرزی پزیشكییەوە لەسەر ئاستی عیراق پلەی یەكەمی بەدەستھێناوە بۆ چارەسەركردنی نەخۆشی شێرپەنجە.

PUKMEDIA