كۆمسیۆن دەست بەوەرگرتنی تانەكان دەكات

PUKMEDIA

كۆمسیۆنی باڵای سەربەخۆی هەڵبژاردنەكانی عیراق

بەگوێرەی یاسای كۆمسیۆن لەئەمڕۆوە تا سێ رۆژی دیكە  قەوارەو كاندیدەكان دەتوانن لەبەردەم دەستەی دادوەری هەڵبژاردندا تانە لەئەنجامەكانی هەڵبژاردنی پەرلەمانی كوردستان بدەن و لەماوەی 10 رۆژیشدا تانەكان یەكلایی دەكرێنەوە.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بەگوێرەی یاسای كۆمسیۆن، دوای راگەیاندنی ئەنجامەكانی هەڵبژاردنی خولی شەشەمی پەرلەمانی كوردستان لەلایەن ئەنجومەنی كۆمسیارانەوە، قەوارەو كاندیدەكان دەتوانن لەرۆژی دوای بڵاوكردنەوەی ئەنجامەكانەوە بۆ ماوەی سێ رۆژ لەبەردەم دەستەی دادوەری هەڵبژاردن تانە لەئەنجامەكان بدەن".

"بەگوێرەی یاساكەش، لە ئەمڕۆوە 31/10/2024، هەتا كوتایی هاتنی دەوام لە رۆژی یەك شەممە 3/11/2024، تانەی قەوارە سیاسی و كاندیدەكان وەردەگیرێت" جومانە غەلای وادەڵێت.

وتیشی: "دەستەی دادوەری هەڵبژاردنەكان ماوەی هەفتەیەكی لەبەردەستدایە، بۆ وەرگرتنی دۆكۆمێنتەكانی پەیوەندیدار بە تانەكان لە كۆمسیۆن و لەماوەی 10 رۆژیشدا تانەكان یەكلایی دەكرێنەوە".


پێشتریش سلێمان مستەفا حەسەن پسپۆڕ لە كاروباری هەڵبژاردن لە وتارێكدا كە لە بەشی بیروڕای PUKMEDIA بڵاوكراوەتەوە دەڵیت: "بەپێی یاسای كۆمسیۆنی فیدراڵی و یاسای هەڵبژاردنی پەرلەمانی كوردستان، لایەنە زەرەر مەندەكان بۆیان هەیە لەرۆژی دوای راگەیاندنی ئەنجامەكانی هەڵبژاردن لەلایەن ئەنجومەنی كۆمسیارانەوە، بۆماوەی سێ رۆژ لەبەردەم دەستەی دادوەری هەڵبژاردن تانە لەئەنجامەكان بدەن، دەستەی دادوەری هەڵبژاردنەكان ماوەی هەفتەیەكی لەبەر دەستدایە بۆ وەرگرتنی دۆكۆمێنتەكانی پەیوەندیدار بە تانەكان و لەماوەی 10 رۆژدا تانەكان یەكلایی دەكاتەوە، دوای كۆتایی یەكلایی كردنەوەی تانەكان ئەنجامەكان پەسەند دەكات و بۆ كۆمیسیۆنیان دەنێرێتەوە بەمەبەستی راگەیاندنیان بەشیوەی رەسمی و كۆتایی، وەك لە بڕگەی 7 یاسای كۆمیسیۆندا هاتووە، هەروەها بڕیارەكانی دادگای هەڵبژاردنێش بنبڕن و قابیلی تانە لێدان نین وەك لە بڕگەی 3ی ماددەی 19 ی یاسای كۆمیسیۆندا هاتوە".

PUKMEDIA