سەرۆكایەتی كۆمار: لایەنە سیاسییەكان بۆ پێكهێنانی حكومەت كۆببنەوە

نوسینگەی راگەیاندنی سەرۆكایەتی كۆمار

سەرۆكایەتی كۆمار

بەبۆنەی سەركەوتنی هەڵبژاردنی خولی شەشەمی پەرلەمانی كوردستانەوە، سەرۆكایەتی كۆمار پیرۆزبایی لەگەلی كوردو سەرجەم لایەن و قەوارە بەشداربووەكانی ئەم پڕۆسە دیموكراسییە كردووە، هاوكات پیشەییبونی تەواو و دەستپاكی كۆمیسیۆنی باڵای سەربەخۆی هەڵبژاردنەكان لەبەڕێوەبردنی پڕۆسەكەدا بەرز دەنرخێنین و داواش لە لایەنە سیاسییەكان دەكات بۆ پێكهێنانی حكومەت كۆببنەوە .

سەرۆكایەتی كۆمار لەپەیامێكدا وێڕای پیرۆزبایی، داوا لە سەرجەم لایەنە سیاسییەكان دەكات لەسەر مێزی دیالۆگی نیشتمانی بنیاتنەرانە كۆببنەوە لەپێناو پێكهێنانی حكومەتی هەرێم لەسەر بنەمای خزمەتی خەڵك و كاركردن بۆ برەودان بە پڕۆسەی بنیاتنان و ئاوەدانكردنەوە و بوژاندنەوەی ئابووری و بەدیهێنانی گەشەپێدانی بەردەوام. 

ئاماژە بەوەشدەكات: "هەڵبژاردن جگەلەوەی مافێكی دەستوریی بنەڕەتییە، كۆڵەكەیەكی سەرەكییە لە سیستمی دیموكراسیی پەرلەمانیی، هەروەها جێگای شانازییە بۆ هەموو عیراقییەكان".

راشیدەگەیەنێت: "داوای رێزگرتن لە ئەنجامەكانی هەڵبژاردن و ئیرادەی ئازادیی خەڵك دەكەین، هەروەها پشتیوانی بۆ تەواوكردنی رێڕەوی دەستوری و دیموكراسی لەهەرێمی كوردستان دووپاتدەكەینەوە بەجۆرێك یەكڕیزی نیشتمانی بەهێزبكات و خواستی گەلەكەمان بۆ گەشەپێدان و خۆشگوزەرانی و پێشكەوتن بەدیبهێنێت". 

PUKMEDIA