هەڵەبجە بەرزترین رێژەی دەنگدانی تایبەت تۆماردەکات

PUKMEDIA

دەنگدانی تایبەت

رێژەی دەنگدانی تایبەت لە بازنەی هەڵەبجە گەیشتە 95٪، کەبەرزترین رێژەی دەنگدانە لەسەر ئاستی هەر چوار پارێزگاکەی هەرێمی کوردستان و پرۆسەکەش بە چاودێری نوێنەری لایەنە سیاسی و رێکخراوە نێودەوڵەتی و ناوخۆییەکان بەڕێوەدەچێت.

لەکۆی 952 کەس کە مافی دەنگدانی تایبەتیان هەیە لەهەڵەبجە، تائێستا 909  کەس دەنگی داوەو تەنها 43 کەس ماوە دەنگبدەن و بەگوێرەی زانیارییەکانی نوێنەری یەکێتی لەناوەندی دەنگدانی بورهان لە هەڵەبجە کە بە PUKMEDIA ی راگەیاند، رێژەی دەنگدان بەرزبوەتەوە بۆ 95٪ کە بەرزترین رێژەیە لەسەر ئاستی هەر چوار بازنەکەی هەرێم.

نوێنەرەکەی یەکێتی راشیگەیاند: "تەنها 43 دەنگدەری تایبەت ماوە دەنگبدەن، پرۆسەکەش زۆر بەهێمنی و بەپێی رێنماییەکانی کۆمسیۆن بەڕێوەدەچێت و هیچ گرفتێک لە ئارادا نییە و پرۆسەکەش بەئامادەبونی نوێنەری لایەنە سیاسی و رێکخراوە نێودەوڵەتی و ناوخۆییەکان بەڕێوەدەچێت".

بەیانی ئەمڕۆ 18-10-2024 سەعات 7 دەنگدانی تایبەت بۆ هەڵبژاردنی خولی شەشەمی پەرلەمانی کوردستان دەستیپێکرد و تا سەعات 6ـی ئێوارە واتە بۆ ماوەی 11 سەعات پڕۆسەکە بەردەوام دەبێت.

PUKMEDIA