له‌ده‌نگدانی تایبه‌تدا زیاتر له‌ 215 هه‌زار ده‌نگده‌ر ده‌نگده‌ده‌ن

PUKMEDIA

دەنگدان

سبه‌ینێ 18-10-2024 له‌ سه‌عات 7ـی به‌یانییه‌وه‌ ده‌نگدانی تایبه‌ت بۆ هه‌ڵبژاردنی خولی شه‌شه‌می په‌رله‌مانی كوردستان ده‌ستپێده‌كات و بڕیاره‌ تا سه‌عات 6ـی ئێواره‌ واته‌ بۆ ماوه‌ی 11 سه‌عات پڕ‌ۆسه‌كه‌ به‌رده‌وامبێت.

به‌پێی ئه‌و زانیاریانه‌ی كه‌ PUKMEDIA له‌ كۆمسیۆنه‌وه‌ ده‌ستیكه‌وتووه‌، له‌ ده‌نگدانی تایبه‌تدا، له‌هه‌ر چوار بازنه‌ی هه‌ولێر، سلێمانی، دهۆك، هه‌ڵه‌بجه‌، 215 هه‌زارو 960 ده‌نگده‌ر مافی ده‌نگدانیان هه‌یه‌. 

كۆمسیۆن 165 ناوه‌ندی ده‌نگدان بۆ ده‌نگدانی تایبه‌ت له‌ هه‌رێم ده‌كاته‌وه‌ كه‌له‌هه‌ولێر 62 ناوه‌ندو له‌سلێمانی 57 ناوه‌ندو له‌دهۆك 33 ناوه‌ندو له‌هه‌ڵه‌بجه‌ش یه‌ك ناوه‌ند ده‌بێت، ئه‌مه‌ش له‌كاتێكدایه‌ ژماره‌ی وێستگه‌كانی ده‌نگدانی تایبه‌ت له‌هه‌ر چوار بازنه‌كه‌ی هه‌رێم 749 وێستگه‌یه‌ كه‌ له‌هه‌ولێر 306 وێستگه‌و له‌سلێمانی 276 وێستگه‌و له‌دهۆك 142 وێستگه‌و له‌بازنه‌ی هه‌ڵه‌بجه‌ش 3 وێستگه‌یه‌، هه‌روه‌ها جگه‌ له‌چوار پارێزگاكه‌ی هه‌رێمی كوردستان، له‌ كه‌ركوك، به‌غدا، سه‌لاحه‌دین، نه‌ینه‌وا، دیاله‌، واست و ئه‌نبار بنكه‌ بۆ ده‌نگده‌رانی تایبه‌تی خولی شه‌شه‌می په‌رله‌مانی كوردستان ده‌كرێنه‌وه‌.

بۆ ده‌نگدانی تایبه‌ت 251 هه‌زار و 700 وه‌ره‌قه‌ی ده‌نگدان ئاماده‌كراون، وه‌ره‌قه‌كان ناوی 136 لیست و 84 كاندیدی تاك و20 كاندیدی توركمان و 18 كاندیدی مه‌سیحی تێدایه‌ و له‌ 165 بنكه‌و له‌ 749 ویستگه‌ ده‌نگ ده‌ده‌ن.

دوای شه‌ش ساڵ بڕیاره‌ رۆژی 18ـی 10ـی 2024ـه‌ ده‌نگدانی تایبه‌ت و رۆژی 20ـی 10ـی 2024 ده‌نگدانی گشتی بۆ هه‌ڵبژاردنی خولی شه‌شه‌می په‌رله‌مانی كوردستان ئه‌نجامبدرێت كه‌ به‌كۆی گشتی 2 ملیۆن و 899 هه‌زارو 578 كه‌س مافی ده‌نگدانیان هه‌یه‌ و دابه‌شكربوون به‌سه‌ر چوار بازنه‌ی، هه‌ولێر، سلێمانی، دهۆك، هه‌ڵه‌بجه‌.


PUKMEDIA