رەفعەت عەبدوڵا: هەژماری من شكستیهێناوەو تەوتین چارەسەرە

PUKMEDIA

رەفعەت عەبدوڵا لە دیداری رۆژنامەنوساندا

رەفعەت عەبدوڵڵا، لە دیدارێکی رۆژنامەنووسیدا، کە  لە مەکتەبی رێکخستن بەڕێوەچوو، رۆشنایی خستە سەر بەرنامەی نوێی کارکردنی یەکێتی و لەوەڵامی پرسیارێکی PUKMEDIA شدا رایگەیاند: "وەرگرتنەوەی پۆستی سەرۆک وەزیران مەحاڵ نییەو هەژماری منیش بەتەواوی لە سلێمانی شکستی هێناوەو دوای هەڵبژاردنیش لەهەرێمی کوردستان کۆتایی پێدێت و تاکە چارەسەری کێشەی مووچە تەوتینە".

لەدیدارەکەدا، رەفعەت عەبدوڵڵا ئەندامی مەکتەبی سیاسی و سەرپەرشیاری بازنەی هەڵبژاردنی سلێمانی لەوەڵامی پرسیاری رۆژنامەنوسی PUKMEDIA دا لەبارەی وەرگرتنەوەی پۆستی سەرۆک وەزیران رایگەیاند: "یەکێتی هیزێکی گەورە و کاریگەرە و هیچ شتێک مەحاڵ نییە، بەرنامەی یەکێتی بۆ خزمەتی خەڵکە و بە بەدەستهێنانی زۆرترین متمانەی خەڵک دەتوانین پۆستی سەرۆک وەزیران وەربگرینەوە".

هەژماری من لای یەکێتی کۆتایی هاتووە

هەر لەوەڵامی پرسیارێکی تری PUKMEDIA دا، رەفعەت عەبدوڵڵا وتی: "لەم چەند ساڵەی کێشەی دواکەوتنی مووچە هەبووە، تیمی یەکێتی لە حکومەت و سەرۆک بافڵیش بەردەوام لەهەوڵدا بوون لەبەغدا ئەو کێشانە چارەسەر بکەن و فراکسیۆنی یەکێتیش هەوڵەکانی بۆ ئەو مەبەستە چڕکردۆتەوە، بەڵام کیشەکان لای حکومەتی هەرێم بوون، کەداتایەکی دروستیان نەخستوەتە بەردەم بەغدا، بۆ هەژماری منیش ، ئەوە لای یەکێتی یەکلایی بۆتەوەو ئەو هەژمارە رەتدەکەینەوەو کۆتایی هاتووە، لە حکومەتی داهاتووشدا لەهەموو هەرێمی کوردستان رەتدەکرێتەوە، لەهەموو جیهانیشدا شتی وا نەبووە پارە و قوتی خەڵک لە بانکی تایبەت و تاکەکەسییەوە دابەشبکرێت، لەبەرامبەردا تەوتینی مووچە چارەسەری کێشەی مووچە دەکات".

یەکێتی بە کۆمەڵێک هەوراز و نشێودا تێپەڕی

روونیشیکردەوە: "یەکێتی لە چەند ساڵی رابردوودا بە کۆمەڵێک هەوراز و نشێودا تێپەڕی، بەهۆیەوە جۆرێک لە فرە خیتابی و فرە جەمسەریی دروستبوو کە ئەو حزبەیان بەرەو لاوازی دەبرد، بەڵام لە سێ ساڵی رابردوودا و بەتایبەتیش لەدوای پێنجەمین کۆنگرەوە یەکێتییەکی یەکڕیز و یەکگوتار هاتووەتە ئاراوە کە دەتوانێت لەئاستی تەحەدییەکانی بەردەمیدا بێت و ئەوەشی بە کردەوە سەلماندووە".

وتیشی: "ئێستا یەکێتی لەسەر ئاستی ناوخۆ و عیراق و ئیقلیمی و نێودەوڵەتیش هێزێکی کارا و گوێلێگیراوە و دوو ساڵی رابردوو لە بابەتەکانی پێکهێنانی حکومەتی عیراقدا سەنگی ئەم حزبەی ئێمە بەتەواوەتی بۆ لایەنەکانی بەغداش روونبووەوە. لەئاستی ناوخۆشدا ئەو یەکڕیزیی و یەکگوتارییەی یەکێتی و روئیا نوێیەکەی بۆ حوکمڕانی، ئەو شێوازی خۆسەپێنییەی لایەنێک بەسەر کۆی جومگە سەرەکییەکانی حوکمڕانیدا رەتدەکاتەوە و کە دروشمی دەیڕوخێنین و کۆتایی پێدەهێنین-ی لەم بانگەشەیەدا بەرزکردووەتەوە، مەبەستی یەکێتی ئەزموونەکە و حکومەتەکەمان نییە کە خۆی خەباتی لەپێناودا کردووە و خوێنی بۆ بەخشیوە، بەڵکو مەبەستی لە رووخاندنی ئەو دیدگا و تێڕوانینەیە کە هەنووکە حوکمڕانیی پێ دەکرێت و لایەنێک بە ئاشکرا سیاسەتی برسیکردنی هەموو خەڵک و خوڵقاندنی قەیران لەدوای قەیران و سزادان و جیاوازیکردن لەنێوان خەڵک و ناوچە جیاجیاکاندا پەیڕەو دەکات، یەکێتیش دەیەوێت ئەو تێز و تێڕوانینە بڕوخێنێت."

یەکێتی یەک دیدگا و یەک گوتارە

ئەوەشی روونکردەوە کە دەوترێت ئێستا یەکێتی یەک دیدگا و یەک گوتار و سیاسەتی هەیە، مانای ئەوە نییە کە یەکێتی بیروڕای جیاوازی تێدانییە، بەڵام وتی: "هەموو بیروڕاکان دەخرێنەڕوو و بە دیالۆگ و موناقەشە لەسەر سیاسەتێکی یەکگرتووانە ساغ دەبێتەوە و ئەوە دەبێتە بڕیاری سەرۆک و سەرکردایەتی و هەمووانیش ئەوە جێبەجێ دەکەین و دەبێتە نەخشەڕێگەی کارکردنمان".

رەفعەت عەبدوڵڵا وتیشی: "دوو سێ ساڵی رابردووی یەکێتی لە بەغدا و هەڵبژاردنی پارێزگاکان و ئەو بەڵێنانەی کە داوێتی و جێبەجێی کردوون، رۆڵی هەبووە لەو متمانەیەی کە خەڵک بە یەکێتیی پەیدا کردووەتەوە و وتی: ئێستا ئیتر یەکێتی روو لە هەورازە و زۆربەی قەیرانەکانی تێپەڕاندووە، هەروەک چۆن لە هەڵبژاردنی ئەنجومەنی پارێزگاکانی عێراقیشدا بینیمان یەکێتی ئەنجامێکی زۆر باشی هەبوو، کوردی کەرکوک و ناوچە دابڕێنراوەکان لە هەڵبژاردنەکانی 2018 و 2021 و 2023 دا بە دەنگەکانیان وەڵامی نەیارەکانیان دایەوە و یەکێتییان بردە پلەی یەکەمەوە و خیانەتکاری راستەقینەیان ئاشکراکرد".

هەولێر وەردەگرینەوە

ئەوەشی وت: "بۆ پرسی ژنان ئێمە دەمانەوێت خۆیان بە هێز و توانای خۆیان بێنە ناو دەسەڵات نەک ئێمە دەستیان بگرین، دەبێت بونی خۆیان لەوە بەهێزتر بێت، بەتایبەت لەناو پەرلەمانی کوردستاندا دەمانەوێت کارا و بەرچاوبن".

"یەکێتی کەدەڵێت هەولێر وەردەگرینەوە، ئەیەوێت هەولێر بکاتە شارێک پڕ لە خزمەتگوزاری بێت بۆ خەڵکە گشتی و هەژارەکەی نەک بەس تەنها بۆ دەوڵەمەندەکان، بۆ ئەوەی بتوانین لە رووی ئەمنیی و خزمەتگوزارییەوە خزمەتی هەولێر بکەین، زەویی داگیرکراوی هەولێرییان بگەڕێنینەوە کەلەلایەن دەسەڵاتەوە داگیرکراون، خەڵکی هەولێر بەڕادەیەک زۆر نیگەرانن".

PUKMEDIA