پەیامی لیستی ١٢٩ بۆ بازنەی دهۆک

PUKMEDIA

لیستی ١٢٩ـی یەکێتیی نیشتمانیی کوردستان

لیستی ١٢٩ـی یەکێتیی نیشتمانیی کوردستان پەیامێک ئاڕاستەی دەنگدەرانی جەماوەری نیشتمانپەروەری پارێزگای دهۆک دەکات و ئاماژە بەوەدەکات: "یەکێتیی نیشتمانیی کوردستان کار بۆ راستکردنەوەی رێڕەوی حکومڕانی دەکات و چارەسەری کێشەکانی هەرێم و حکومەتی ناوەندیش لە بەغدا دەبینێت نەک پایتەختی وڵاتانی دیکە، هەروەها دژی دەستگیرکردنی رۆژنامەنووسانین و کار بۆ دابینکردنی ژیانێکی شایستە دەکەین بۆ هەموو لایەک".

دەقی پەیامەکە

پەیاما ئێكەتی نیشتمانی كوردستان بۆ هەلبژارتنێن پەڕلەمانێ كوردستانێ

سەركەڤتنا مەزن, ڕاستڤەكرنا رێڕەوا حوكمڕانیێ, باشكرنا ژیارا وەڵاتیان, پاراستنا وان ب هێزەكا مەزن یا وەكو ئێكەتیێ دهێتە كرن

كۆمێن خەلكێ كوردستانی

جەماوەرێ نیشتمانپەروەرێ پارێزگەهێن (هەولێر, سلێمانی, دهۆك, هەڵەبجە)
ئاكنجیێن خۆڕاگرێن ئیدارەیێن سەربەخۆیێن (گەرمیان, راپەڕین, سۆران, زاخۆ)

دەنگدەرێن هەمی باژێڕ و باژێڕك و گوندێن هەرێما كوردستانێ

هەرێما كوردستانێ ژ لایێ سامانێن سرۆشتی ڤە هەرێمەكا دەولەمەندە و ژ لایێ گەشتیاری ڤە دەڤەرەكا دلڤەكەرە, ژ لایێ چاندنێ ڤە ژی خودان ئاخەكا ب خێروبێرە, ئەڤ  تایبەتمەندییە بنەمایێن ئاڤاكرنا نیشتمانەكێ ئاڤەدان و پێشكەڤتینە, كو د بن سیبەرا وێ دا خوشگوزەرانی دێ بۆ هەمی تەخ و چینان پەیدا بیت, بەلێ د ڤان چەند ساڵێن داویێ دا ژ ئەگەرێ لادانێ ژ پڕەنسیپێن هەڤپشكێن حكومەتێ و بجهئینانا سیاسەتەكا نەواقعی و ئیدارەدانەكا نەدروست, هەرێما كوردستانێ ژ لایێ ئابۆری ڤە پاشداچوویە و چەندین جۆرێن گەف و مەترسیێن جدی لسەر هەرێمێ هەنە, رۆژ بۆ رۆژێ ژی ژیانا وەڵاتیان بەرەڤ خرابتر و سەنگێ هەرێما كوردستانێ ژی بەرەڤ لاوازیێ دچیت, ئەڤە ژی د ئاستێ خواستێن ئێكەتیێ و خەبات و قوربانیدان و خۆڕاگرییا گەلێ كوردستانێ دا نینە, لەوڕا ئێكەتی نیشتمانی كوردستان سۆز و پەیمان دایە ب ئەركێ خۆ یێ دیرۆكی ڕابیت و بۆ ڤان هەلبژارتنان ب بەرنامەیەكێ هەمەلایەن و تەڤگر ژ پێخەمەتا پاراستنا قەوارەیێ هەرێما كوردستانێ و باشتركرنا ژیارا كومێن خەلكێ كوردستانێ بەرەڤ راستڤەكرنا رێڕەوێ پێنگاڤێ پاڤێژیت, چونكی ئێكەتی دامەزرێنەرا راستەقینەیا سیستەمێ فیدراڵی یە ل هەرێما كوردستانێ ل ساڵا 1992, پشتی هەڕفاندنا رژێما بەعس ژی ب بزاڤێن سەرۆك مام جەلال و ئێكەتیێ ئەڤ سیستەمە د دەستوورێ عیراقێ دا هاتە بنەجهكرن, لەوڕا نوكە دەمێ وێ چەندێ یە ئەڤ ئەزموونە ژ شكەستن و قۆرخكاریێ بهێتە پاراستن.

- سیاسەتا ئێكەتیێ بۆ چارەسەركرنا ئارێشەیێن د ناڤبەرا حكومەتا هەرێمێ و حكومەتا فیدراڵ دا یا ڕوونە كو ل بەغدایە نەك ل پایتەختێ وەڵاتەكێ دی و دڤێت د گەل حكومەتا فیدراڵ رێككەڤتنا هەردەمی بهێتە كرن بۆ چارەسەركرنا ئاڕێشەیا مووچەیێ فەرمانبەرێن هەرێمێ و هەمی ئاڕێشەیێن دی, ب ئاوایەكێ وەسا كو مافێن خەلكێ كوردستانێ و مافێن دەستووریێن هەرێمێ دپاراستی بن.

- نێڕینا ئێكەتیێ ئەوە كو ئابۆرێ سەربەخۆیێ هەرێمێ ب وێ چەندێ نابیت كو پەیوەندیێن ئابۆری ب تمامی د گەل حكومەتا فیدراڵ ببڕین و شاهدەمارێ ئابۆرێ هەرێمێ راستەوخۆ ب لایەنەكێ دەرەكی ڤە گرێ بدەین, چونكی دێ رۆژەك هێت  وی شاهدەماری دێ ژ رەهـوریشال ڤە ئیننە دەر, ب مخابنی ڤە ل دووماهیێ ژی هەر ئەو چەندە ڕویدا, لەورا مە نەهێلا غاز ژی ب هەمان دەردێ نەفتێ بچیت.

- پڕەنسیپێ بنەجهـ ل نك مە ئەوە, هەر ئەم ب تنێ دەستهەڵاتدارێن ڕەها نینین, بەلكو هەمی هێز و لایەنێن دی یێن سیاسیێن كوردستانێ ل دویڤ ئیستیحقاقا هەلبژارتنان و رێككەڤتنا پێشوەخت د برێڤەبرنا ئیدارەیاندا هەڤپشكن, ئەم رێزێ ل ئیستیحقاقێن هەلبژارتنان دگرین, ل نك مە  فرەیی یا سیاسی و ئازادییا كاركرنا پارتان د گۆپیتكێ دایە و ب چاڤێ دیمۆكراسیەت و هەڤدوو  قەبولكرنێ سەرەدەری د گەل هەمی هێزان دهێتە كرن, بارەگەهـ ناهێنە دائێخستن و ناهێنە سۆتن و لایەنگرێن لایەنێن دی تووشی ڕاهێلان و ئاڕێشان نابن.

- ل نك مە كەرتێن (چاندن, پیشەسازی, خواندنا بلند, ئاژەڵداری, گەشتوگوزاری, ساخلەمی) و هەمی سێكتەرێن دی د بەرفرەهبوونێ دانە و دەستێ ئاڤەدانیێ گەهشتیە دویرترین گوندێن سەرسنووران و ئارمانجا مە ئەوە زێدەتر لێ بكەین.

- دژی دەستەسەركرنا رۆژنامەڤاناینە ل سەر هزروبیرێن جیاواز و ئازادییا ڕەئی دەربڕین و رەخنەگرتنێ ل حكومەتێ.

- مافێ خۆنیشاندانان مافەكێ دەستپێكی یێ هەمی تەخ و چینایە, د ڕابۆری ژی دا ب پراكتیكی مە ئەو چەندە سەلماندییە, بەردەوام ژی دێ بەڕەڤانیێ ژێ كەین.

- ڕێ چارەیێن سیاسی و دبلۆماسی بۆ پاراستنا ئارامیا سنووران و پاراستنا وەڵاتیان ژ كارێن مە یێن سەرەكییە.
- هەر جهـ و باژێڕەكێ كوردستانێ ب جهـ و باژێڕێ خۆ دزانین و مە هەوڵ نەدایە ب ڕێكا میدیایێ سیمایەكێ كرێت بدەینە چ باژێڕ و باژێڕكەكی, چونكی ئێكەتی هێزا هەمی نیشتمان و كوردستانێ یە و خزمەتكرنا هەمی باژێڕ و باژێڕك و گوندێن كوردستانێ ب ئەركێ خۆ دزانیت.

- د چاڤێ مە دا هەمی وەڵاتی د ئەرك و ماف و ئیمتیازان دا وەكهەڤن, وەلائا حزبی پیڤەر نینە بۆ پێدانا ئیمتیازان.

- ئێكەتی چ پێكهاتەیان بۆ بەرژەوەندیێن خۆ بكار نائینیت و رێزێ ل ئیرادەیا وان دگریت, باوەرییا وێ یا نەگوهۆڕ ئەوە كو پێدڤییە پێكهاتە بخۆ نوینەرایەتیا خۆ بكەن.

- باوەرییا مە یا نەگوهۆڕ ئەوە كو ئاوارە(نازح) بزڤڕنە سەر جهێن خۆ, چونكی باژێڕێن عیراقێ د ئارامن و پێدڤی ناكەت ئێدی ل هەرێما كوردستانێ بمینن, هێلانا وان یا ب زۆری بەرۆڤاژی بنەمایێن ئەخلاقی و یاسایی یە و نابیت بۆ مفایێن ئابۆری و بكارئینانا وان د هەلبژارتناندا ڕێك ل زڤڕینا وان بهێتە گرتن.

- مە ل پشتی ریفراندۆمێ, گەلەك بزاڤ كرن پارێزگارەكێ كورد بۆ كەركوكێ بدانین و ئەڤە بەشەك بوو ژ رێككەڤتنا پێكئینانا كابینا حكومەتێ ژی, بەلێ لایەنێ دی بەرۆڤاژی رێككەڤتن و بەرپرسیارییا كوردانە گەلەك هەوڵ دان داكو پارێزگارێ هاتیە سەپاندن د پۆستێ خۆ دا بمینیت و نوكە ژی پشتەڤانیێ ل كەسانێن غەیرە كورد دكەن بۆ وی پۆستی.

- مە ژ بەر بەرژەوەندیێن بلندێن نەتەوەیی و نیشتمانی, مە داخواز كر كورد ب ئێك لیست پشكدارییا هەلبژارتنێن كەركوكێ بكەن داكو نوینەرایەتیا مە پتر بیت و كوردەك ببیتە پارێزگار و خۆسەپاندن و تەعریب و گوهۆڕینا دیمۆگرافی ب دووماهی بهێت, بەلێ لایەنێ دی ژ بەر بەرژەوەندیێن بەرتەنگێن حزبی ب جودا پشكداری كر و ژ ئەگەرێ ڤێ چەندێ كوردان كورسیەك ل وی باژێڕی ژدەستدا.


كۆمێن خەلكێ كوردستانێ
دەنگدەرێن هەرێما كوردستانێ ژ سەرجەم تەخ و چینان
گەنج, ژن, كرێكار, كاسبكار, جوتیار, مووچەخۆر

ئەڤ هەلبژارتنە دەلیڤەیەكا چارەنڤیسی یە, هەروەسا بەرپرسیارییەكا دیرۆكی دئێخیتە سەر ملێن مە هەمیان كو پێكڤە ڤێ دەلیڤەیێ  ژ دەست خۆ نەكەین و بزاڤا ڕاستڤەكرنا رێڕەوا حوكمڕانیێ ل هەرێما كوردستانێ بكەین, پێكڤە بڕیارا ڕاستڤەكرنا رێڕەوا سیاسی و ئیداری و دبلۆماسی و خزمەتگوزاری ل هەرێما كوردستانێ بدەین و خەلكێ هەرێما كوردستانێ ژ دەست تاكڕەوی و خۆسەپاندن و بێمووچەییێ قورتال بكەین.

- ئێكەتی تاكە هێزە, ب دەنگ و پشتەڤانیا هەوە دشێت د بن سیبەرا حوكمڕِانیەكا خەمخۆر دا خزمەتەكا ژ هەژی و راستەقینە پێشكێشی كۆمێن خەلكێ كوردستانێ بكەین, هەمی وان مەترسی و قەیرانێن جۆر ب جۆرێن كو كوردستان ڤەگرتی ڤەڕەڤینین.

- پشتەڤانێن مە بن بۆ بهێزتركرنا ئێكەتیا هەوە, چونكی ب بهێزتربوونا ئێكەتیێ دێ هەرێمەكا بهێزتر مسۆگەر بیت و ئاڕێشەیا مووچەیێ فەرمانبەرێن هەرێما كوردستانێ ب ئێكجاری دێ چارەسەر بیت.

- د گەل مە دا بن بۆ بجهئینانا بەرنامێ فرەلایەنێ ئێكەتیێ كو ژێدەرێ وێ هناڤێن كۆمێن خەلكێ كوردستانێیە و بەرژەوەندیێن هەمی تەخ و چینان بخۆڤە گرتییە.

ل داویێ دبێژین.. هەرێما كوردستانێ پێدڤی ب (هێز)ەكا بهێزە, ب پشتەڤانیا هەوە  ئەو هێزە ژی هەر ئێكەتی بوویە و هەر دێ ئێكەتی بیت.

- ئێكەتی نیشتمانی كوردستان هێزە و ب وێ هێزێ  دشێین سنوورەكێ بۆ یاساشكێنیێ ل هەرێمێ بدانین.
-پێكڤە دشێین جەماوەرێ پارێزگەهێن هەولێر و دهۆكێ ژ دەستهەڵاتا تاكەحزبی و تەپەسەركرنێ رزگار بكەین.
-پێكڤە دشێین دووماهیێ ب سزایێن سەر پارێزگەهێن سلێمانیێ و هەڵەبجە و ئیدارەیێن راپەڕین و گەرمیان و قەزا كۆیە بینین.

- هەر ب هێزەكا وەكو ئێكەتی دشێین هەرێمێ بەرەڤ ئیدارەیەكا سەرتاسەری و ئارام و خزمەتگوزار ببەین.

بۆ پێشڤە بەرەڤ سەركەڤتنا لیستا ( 129 ) یا ئێكەتی نیشتمانی كوردستان و
ڕاستڤەكرنا رێڕەوا حوكمڕانیێ ل هەرێما كوردستانێ

لیستا ئێكەتی نیشتمانی كوردستان ژمارە ( 129)
PUKMEDIA