شێخ جەعفەر: دەنگبدەن بەیەكێتی بۆ كۆتایی هێنان بەدەسەڵاتی خۆسەپێن

PUKMEDIA

شێخ جەعفەر شێخ مستەفا

شێخ جەعفەر شێخ مستەفا لێپرسرای ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان پەیامێك ئاڕاستەی كۆمەڵانی خەڵكی كوردستان و دەنگدەران دەكات و رایدەگەیەنێت: "دەتوانن بەدەنگەكانتان قەوارەی هەرێم بپارێزن و هاوسەنگی هێز بگۆڕن و حكومڕانی راستبكەنەوە" دەشڵێت: "دەنگبدەن بەیەكێتی بۆ كۆتایی هێنان بەدەسەڵاتی خۆسەپێن".

راشیدەگەیەنێت: "بەدەنگدان بە لیستی ١٢٩ ی یەكێتیی نیشتمانیی كوردستان یارمەتیدەر و بەشداردەبن لە پێكهێنانی حكومەتێك كە گوێ لە خواست و داواكارییەكانتان بگرێت و كۆتایی بە سەردەمی قۆرخكاری بهێنێت".

لەدرێژەی پەیامەكەیدا شێخ جەعفەر شێخ مستەفا ئاماژە بەوەشدەكات: "بە دەنگدانیتان بە كاندیدانی دڵسۆزی یەكێتی داستانێكی دیموكراسی تۆمار بكەن تاوەكو ببێتە پەندو وانە بۆ دەسەڵاتداری بێباك و خۆسەپێن".

دەقی پەیامەكە:

كۆمەڵانی ستەمدیدەی خەڵكی كوردستان!

 كەسوكاری سەربەرزی شەهیدان و ئەنفالكراوان، پێشمەرگەو هێزە ئەمنییە قارەمانەكان و تێكۆشەرانی دێرین و زیندانیانی سیاسی و كەمئەندامانی سەنگەرو رێكخستنە دێرینەكان. مامۆستایانی ئایینی و فەرمانبەران و مامۆستایان و مامۆستایانی زانكۆو خانەنشینانی مافخوراو، خوێندكارانی رۆشنفكر، كرێكاران و جوتیارانی زەحمەتكێش، گوندنشینانی پەناگەی شۆڕش. ژنان و پیاوان و گەنجانی تێكۆشەر، رۆژنامەنووس و نووسەرو رۆشنبیرانی بەهەڵوێست، كاسبكاران و هەژارانی وڵاتەكەم، رێكخراوە خێرخوازەكان و سەرمایەدارانی نیشتمانپەروەر. ئەندازیاران و پزیشكان و كارمەندانی ماندوونەناسی تەندروستی، پارێزەران و مافپەروەرانی هێژا، خاوەن پێداویستییە تایبەتە بەڕێزەكان، وەرزشكارانی ئازیز.

كوردانی تاراوگەی نەهامەتچێژ، ئەی ئەوانەی لەدەستی نادادی و نا رەشیدیی دەسەڵات سەری خۆتان هەڵگرتووە.

دانیشتوانی ئازیزی هەولێری خۆڕاگرو هۆلاكۆ بەزێن،  سلێمانی ئەی شاری رۆشنبیریی و هەڵمەت و قوربانی، 
خەڵكی ستەمدیدەی سنووری پارێزگای كەركوكی قودسی كوردستان، دهۆكی مقاوەمەت و بێشەی شۆڕشی نوێ و هەڵەبجەی سیمبولی ئاشتی و مەزڵومییەتی كورد. دانیشتوانی تێكۆشەری ئیدارە سەربەخۆكانی گەرمیان، سۆران، راپەڕین، زاخۆ.

ئازیزان، هەروك چۆن لەرابردوودا بەهەڵوێستی جوامێرانەتان و بەگیانی خۆتان داكۆكیتان لە قەوارەی هەرێم و دەستكەوتەكانی گەلی كوردستان كردووە، ئێستاش دەرفەتێكی زێڕین هاتووەتە پێشەوە دەتوانن بەدەنگەكانت قەوارەی هەرێم بپارێزن و هاوسەنگی هێز لە هەرێم بگۆرن و ئەو لادانەی لە شێوازی حوكمڕانیدا دروست بووە راستبكەنەوە، دەتوانن لەڕێی دەنگەكانتانەوە بەدەسەڵات بڵێن مانەوەتان لە دەسەڵاتدا یاخوود لادانتان لەسەر كورسی دەسەڵات بەندە بەدەنگ و ئیرادەی گەلی كوردستانەوە، دەتوانن بەدەنگدان بە لیستی 129ی یەكێتی، یارمەتیدەرو بەشداربن لە پێكهێنانی حكومەتێك كە گوێ بەمەینەتی و داخوازییەكانتان بدات و كۆتایی بە سەردەمی قۆرخكاریی بێنن.

داواتان لێدەكەم قۆڵی مەردایەتی لێ هەڵماڵن و خۆتان و كەسوكارو دراوسێ و هاوڕێكانتان بچنە سەر سندوقەكانی دەنگدان و بەدەنگدان بە كاندیدانی دڵسۆزی لیستی 129ی یەكێتیی نیشتمانیی كوردستان،  داستانێكی دیموكراسی ئەوتۆ تۆماربكەن كە ببێتە پەندو وانە بۆ هەر دەسەڵاتدارێكی بێ باك و خۆسەپێن.

PUKMEDIA

دەقی پەیامەكەی شێخ جەعفەر شێخ مستەفا بەڤیدیۆ: