گوتاری فریودەر دەرەقەتی سیاسەتی كوردستانی راستەقینەی یەكێتی نایەت

PUKMEDIA

ستران عەبدوڵڵا

*ستران عەبدوڵڵا 

 ئیتر كەس بەم گوتارە فریودەرە ناخەڵەتێ كە بەرگی كوردستانی لە خۆی پێچاوە و دژی بەرژەوەندییەكانی میللەتەكەشمانە. گەندەڵی و تەزویر و تاكڕەوی و قۆرخكاری و خۆسەپاندن بەناوی كوردستان و كوردایەتییەوە، یان هەر ناوێكیترەوە بكرێت ، فەرقی نییە و هەر قێزوەن و ناپەسەند و ناجۆرە. رەنگە لە حاڵی وادا تاوانەكە چەند قات بێت چونكە بەناوی ئەو ناوە بەرزانەوە دەكرێت. بەناوی كوردستان و كوردایەتی و خەونی گەشی حوكمڕانی كوردییەوە دەكرێت.

تازە رابوونەوەی هوشیارانەی گەلەكەمان بوختان و چەواشە و فریوی ناسیونالیستی ئێوەی تێپەڕاندووەو بڕیاری خۆی داوە، كۆتایی بە سیاسەتی خۆسەپێنی ئێوە بێنێت و جارەنووسی خۆی تەسلیمی دەستی ئەمین بكاتەوە كە  لە تەنگانەو ناخۆشیدا تاقیكردووەتەوە، دەستی ئەمینی یەكێتیی نیشتمانیی كوردستان بەسەرۆكایەتی بافل جەلال تاڵەبانی.

تازە ئەم هاشوهوشەی بە كوردی هەڕەشەی پێ دەكەن و گەلەكەمانی پێ دەتۆقێنن دادات نادات، چونكە دەزانین بەعەرەبی و عەجەمی زمانێكی پاڕانەوەو چەمانەوەتان هەیە و ئەزبەرمان كردووە.

تازە نە ترسی تارمایی شەڕی ناوخۆو نەترسی دنەدانی ئەم دەوڵەت و ئەو دەوڵەت، نە هەڕەشەی تێكدانی سندوقەكانی دیموكراسی  و تەزویری دەنگدان و تەزویری دەنگەكان هیچیان زەفەر بە ئیرادەی گەلەكەمان نابەن.

ئیتر ناتوانن بە گوتاری توندڕەوی نەتەوەیی و تۆمەتباركردنی هەرزانی بەرامبەرەكانتان واقیعی خاكفرۆشی و خەڵك فرۆشی خۆتان پەردەپۆش بكەن.

ئێستا ئیتر سیاسەتێكی كوردانە و كوردستانی راستەقینە، سیاسەتی پەرۆشی بۆ ئیدارەی  هەرێم و یەكپارەچەیی قەوارەكەی، سیاسەتی پەرلەمانێكی بە هەیبەت، دیموكرات و چاودێری یاسا و رێساكان، سیاسەتی حكومەتێكی دەربەست و ئازا و پەرۆش بۆ ژیان و گوزەرانی كۆمەڵانی خەڵك جێ بە سیاسەتی گۆشەگیرو دواكەوتوو، سیاسەتی جیاكاری و فەرق و جیاوازی نێوان شار و دەڤەرەكان، گەڕەك و چین و توێژەكان لێژ دەكات و تەفروتونای دەكات.

لەمەودوا سیاسەتی حكومەتێكی كارا و یەك دەست و پەرلەمانێكی یەك و یەك ریز كۆتایی بە ئیدارەی دیوەخانی راسپاردەو كاكەبرایی و خۆم و خۆمانی دەهێنێت.

ئیتر بەدەنگی گەل لە بەرواری ٢٠ی تەشرینی یەكەمەوە ئێمە ئەمانە دەڕوخێنین كە ئەدگاری دەزگای كلیپ و فیلمی هندی و داتاشینی تۆمەتی بێ بنەمایەو لە جێگەكەی حوكمی دادپەروەرانە و یاساسەروەری دادەنێینەوە.

 كوردایەتی چەواشە تەواو، كوردایەتی گەلپەسەند دێتەوە.

نەخێر بۆ كوردستانی گەندەڵ و جیاكار و قۆرخكار، بەڵێ بۆ كوردستانی دیموكرات و دادپەروەر، كوردستانی حوكمی ژیر و بە ویژدان و زەمیر.

PUKMEDIA