زانکۆی سلێمانی پلەی یەکەمی لەسەر ئاستی عیراق بەدەستهێنا

PUKMEDIA

زانکۆی سلێمانی

بەپێی ریزبەندی دامەزراوەی (تایمز-Times Higher Education)ـی بەریتانی، زانکۆی سلێمانی لە ریزبەندی یەکەمدا دێت لەسەر ئاستی زانکۆکانی هەرێمی کوردستان و عیراق.

پلەی زانکۆی سلێمانی بەرزبووەتەوە

د. کۆسار محەمەد عەلی سەرۆکی زانکۆی سلێمانی لە کۆنگرەیەکی رۆژنامەوانیدا رایگەیاند: "زانکۆی سلێمانی لەسەر ئاستی عیراق پلەی یەکەمی زانکۆکانی بەدەستهێنا، ئەمەش بەپێی زیزبەندی دامەزروەی (تایمز-Times Higher Education)ـی بەریتانی".

"بەبۆنەی بەدەستهێنانی ئەم پلەیە بۆ یەکەم جار پیرۆزبایی لە خۆمان و لە هەموو لایەک دەکەین ، دەستخۆشی لە سەرجەم مامۆستایان و فەرمانبەران و خوێنداکارانی زانکۆی سلێمانی  دەکەین"، سەرۆکی زانکۆی سلێمانی وای وت.

ئاماژەی بەوەشدا: "لە ریزبەندی هەمان دەزگادا، زانکۆی سلێمانی لەنێوان پلەی 2800 بۆ 2900ـی زانکۆکانی جیهان بوو، بەڵام ئیستا زانکۆکەمان هاتووەتە پلەی نیوان 1000 بۆ 1200، ئەمەش دەستکەوتێکی گرنگە بۆ زانکۆی سلێمانی و هەموو هەرێمی کوردستان".

لە یەکەم بەشداریدا زانکۆی سلێمانی یەکەم بوو

ریزبەندی (تایمز-Times Higher Education)، یەکێکە لە ریزبەندە سەرەکییەکانی جیهان، ژمارەیەکی کەمی زانکۆکان دەتوانن بەشداری ئەم ریزبەندییە بکەن بەهۆی ئەو پێوەرانەی کە دانراوە، زانکۆکانی عیراق 7 سالە بەشداری ئەم پرۆسەیە دەکەن، سێ ساڵ زانکۆی بەغدا یەکەم بووە، دوو ساڵ زانکۆی تەکنەلۆجی یەکەم بووە، ساڵێک زانکۆی بابلیۆن یەکەم بووە، ئەمساڵیش زانکۆی سلێمانی لە یەکەم بەشداریکردنیدا پلەی یەکەمی بەدەستهێنا.

دامەزراوەی تایمزی بەریتانی، شانبەشانی دامەزراوەی شانگەهای و دامەزراوەی کواکەرێلی سیمۆندس، یەکێکە لە سێ سەرەکیترین ئەو دامەزراوانەی لە سەر ئاستی جیهان چەندین ڕیزبەندیی جیاجیا بۆ زانکۆکان دەکات گرنگترینیشیان (ڕیزبەندیی زانکۆکانی جیهان)ـە، کە یەکێکە لە بەناوبانگترین و گشتگیرترین ڕیزبەندییەکان و لە هەڵسەنگاندنی زانکۆکاندا پشت بە چەندین پیوەری جیاجیا دەبەستێت.
PUKMEDIA