سەرۆك بافڵ: لەهەولێر بە پارتی دەڵێین كۆتایی بەچی دەهێنین

PUKMEDIA

بافڵ جەلال تاڵەبانی سەرۆكی یەكێتیی نیشتمانیی كوردستان

بافڵ جەلال تاڵەبانی سەرۆكی یەكێتیی نیشتمانیی كوردستان لەناو یاریگایەكی پڕ لەجەماوەرو لایەنگرانی یەكێتیدا لە گەرمیان رایگەیاند: "گەرمیانییەكان هیچ كات یەكێتیان لەبیرنەكردووەو نەیانهێشتووە بڕوخێت، بۆیە داواتان لێدەكەم رۆژی دەنگدان سندوقەكانی دەنگدان سەوز بكەن"، وتیشی: "پارتی هەوڵیدا هەڵبژاردن دوابخات، بەڵام پێیان نەكرا، ئەمجارە ناتوانن تەزویر بكەن بۆیە تۆقیون و لە هەولێر پێیان دەڵێین كۆتایی بەچی دەهێنین".

پاشنیوەڕۆی ئەمڕۆ سێ شەممە ٨-١٠-٢٠٢٤ بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان، بە دروشمی (كۆتایی پێ دەهێنین) چوارەمین كەرنەڤاڵی فراوانی یەكێتی بۆ بانگەشەی هەڵبژاردنی خولی شەشەمی پەرلەمانی كوردستان و ناساندنی كاندیدانی لیستی ١٢٩ـی یەكێتی، لە یاریگای شێروانە بەڕێوچوو و سەرۆك بافڵ رایگەیاند: " گەرمیانی پڕ لە قارەمان و ئەنفال لەجیاتی ئەوەی حكومەت خزمەتی بكات پشتگوێی خستووە، گەرمیانییەكان ئێمە قەرزداری ئێوەین و دەرفەتێكمان پێبدەن ئەو قەرزەتان بدەینەوە".

گەرمیانییەكان هیچ كات یەكێتیان لەبیرنەكردووە

راشیگەیاند: "گەرمیانییەكان هیچ كات یەكێتیان لەبیرنەكردووەو نەیانهێشتووە بڕوخێت، بۆیە داواتان لێدەكەم رۆژی دەنگدان سندوقەكانی دەنگدان سەوز بكەن و بەدەنگی گەرمیانییە قارەمانەكان حكومەتی گەندەڵ دەڕوخێنین".

وتیشی: "پارتی هەوڵیدا هەڵبژاردن دوابخات، بەڵام پێیان نەكرا بۆیە ئەمجارە ناتوانن تەزویر بكەن بۆیە تۆقیون".

تەنها یەكێتی دەتوانێت خزمەت بكات و بەس

سەرۆك بافڵ راشیگەیاند: "یەك حزب دەتوانێت خزمەتی كوردستان بكات ئەویش یەكێتییە، ئێمە بەیەك چاو هەموو كوردستان دەبینین و خزمەتی ئێمە بۆ هەر چوار پارچەی كوردستانە".


وتیشی: "پاتری دیموكراتی كوردستان شەحنی نەماوە، پارتی دیموكرات نییەو لەدیموكراسی دەترسێت، گەندەڵەكان بۆ كوێ دەڕۆن هەر كۆتایی پێدەهێنین".

لەكۆتایی وتەكانیدا سەرۆك بافڵ داوای لە گەرمیانییەكان كردەوە كە پشتیوانی یەكێتیبن بۆ روخاندنی ئەم حكومەتە گەندەڵە بۆگەنەو رۆژی دەنگدان دەنگ بە كاندیدەكانی یەكێتیی نیشتمانیی كوردستان بدەن.

بڕیارە رۆژی ٢٠-١٠-٢٠٢٤، هەڵبژاردن بۆ خولی شەشەمی پەرلەمانی كوردستان بەڕێوەبچێت، یەكێتیی نیشتمانیی كوردستانیش بە دروشمی (كۆتایی پێدەهێنین.) و بەلیستی ١٢٩ و بە ١٧٢ كاندیدەوە كەبەسەر چوار بازنەدا دابەشبوون بەشداری هەڵبژاردن دەكات.

"کۆتایی پێ دەهێنین" دروشمی سەرەکی یەکێتیی نیشتمانیی کوردستان-ە بۆ هەڵبژاردنی خولی شەشەمی پەرلەمانی کوردستان کە بڕیارە رۆژی ٢٠ـی ١٠ـی ٢٠٢٤ ئەنجام بدرێت، هەروەها لیستی ١٢٩ـی یەکێتی بە ١٧٢ کاندید بەشداری دەکات کە دابەشبوون بەسەر چوار بازنەی هەڵبژاردندا، ئەوانیش؛ سلێمانی ٧٢ کاندید، هەولێر ٦٤، دهۆک ٣٠، هەڵەبجە ٦ کاندیدن.

PUKMEDIA