شێخ جەعفەر: یەکێتی بەپشتیوانی دەنگدەران هاوسەنگی هێز دەگۆڕێت

PUKMEDIA

سەردانی شێخ جەعفەر بۆلای دانیشتووانی کۆمەڵێک گوندی سنووری گەرمیان

لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان رایدەگەیەنێت: "خزمەتکردنی سەرجەم ناوچەکان بەوە بەدەست دێت کە لەم هەڵبژاردنەی پەرلەمانی کوردستاندا یەکێتی بتوانێت پێشەنگ بێت لە بەدەستهێنانی متمانەی دەنگدەران، تا بتوانێت هاوسەنگی هێز بگۆڕێت و حکومەتێکی سەرتاسەری کوردستانی گەلپەسەند دابمەزرێنێت ".

شێخ جەعفەر شێخ مستەفا لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان لە سەردانێکیدا بۆ ژمارەیەک گوندی سنووری گەرمیان رایگەیاند: "هەر لەکاتی دروستبوونی مەفرەزە سەرەتاییەکانی شۆڕشی نوێوە، بەهۆی دڵسۆزی خەڵکی ناوچەکەو هەڵکەوتی سەختی جوگرافییەوە، ئەم ناوچەیە مەکۆی شۆڕش بووەو گوندنشیانی تێکۆشەری ئێرە لەلایەک بە ماڵ و حاڵی خۆیان لەخزمەتی پێشمەرگەدابوون و لەلایەکی تریشەوە گیانی پیرۆزی رۆڵەکانیان دەکردە قوربانی خاک و وڵات. بەوهۆیەشەوە رژێمی بەعس زۆر دڕندانە، لە ئەنفال و پێش ئەنفالیشدا رووبەڕوویان دەبووەوەو خەڵکەکەی ئەنفال دەکردو خاکەکەشی سووتماک دەکرد".

"ئەو پرۆژە خزمەتگوزارییانەی لەم ناوچەیە، زۆر کەمن و لەئاست فیداکاریی و قوربانیدانی بێ شوماری دانیشتوانی ئەم ناوچەیەدا نین، بۆیە یەکێتی بەرنامەی ئەوەی هەیە لە داهاتوودا باشتر خزمەتیان بکات، ئەوەش بەوە بەدەست دێت کە لەم هەڵبژاردنەی پەرلەمانی کوردستاندا یەکێتی بتوانێت پێشەنگ بێت لە بەدەستهێنانی متمانەی دەنگدەران، تا بتوانێت هاوسەنگی هێز بگۆڕێت و حکومەتێکی سەرتاسەری کوردستانی گەلپەسەند دابمەزرێنێت کە داخوازییەکانی خەڵک جێبەجێ بکات و چیتر نەبێتە مایەی ماندووکردن و توڕەکردنی کۆمەڵانی خەڵک"، شێخ جەعفەر وای وت.

ئاماژەی بەوەشدا: "لەرۆژی 20ی ئەم مانگەدا، خۆیان و خێزان و کەسانی دەوروبەریان بچنە سەر سندوقەکانی دەنگدان و دەنگ بدەن بەلیستی 129 و ئەوە بۆ دەسەڵاتداران بسەلمێنن  کە خستنەسەر دەسەڵات و لادانیشیان لەسەر دەسەڵات هەر بەدەنگ و  بڕیاری گەلی کوردستانە، بۆیە دەبێت رێز لە ئیرادەی گەل بگرن".

جێی باسە، ئامادەبووان، پێکهابوون لە دانیشتوانی گوندەکانی (بەکر بایەف، بێستانە، چەمی شۆر، قەڵا تەبزان، پارێوڵە، کەڵەشێرە، ئیمام محەممەد، تیلەکۆ، گۆڕی ئەسپ، کانی گوڵ، تمتمە، تەپەکەڕوس، قەڵای تەپەکەڕوس، براوەل، زەردەلیکاو، چرچەقەڵا، دەرەدۆین، گوڵمکەوە، دڕکە، بساکان، دارەوەنە، مراوا،  تازەدێ، نزارە)ـی سنووری گەرمیانی بەسەرکردەوە و داوایلێکردن دەنگ بە لیستی ١٢٩ـی یەکێتیی نیشتمانیی کوردستان بدەن و  تاوەکو یەکێتی بتوانێت سیاسەتی جیاکاری لە خزمەتکردنی ناوچەکان نەهێڵێت.
PUKMEDIA