سه‌رۆككۆماری عیراق به‌شداری ساڵیادی كۆچی دوایی سه‌رۆك مام جه‌لال ده‌كات

PUKMEDIA

پێشوازی لەسەرۆککۆماری عیراق کرا لە کەرکوک

د.له‌تیف جه‌مال ره‌شید سه‌رۆككۆماری عیراق به‌ یاوه‌ری ئه‌ندازیار نزار ئامێدی وه‌زیری ژینگه‌ گه‌یشته‌ پارێزگای كه‌ركوك و له‌لایه‌ن رێبوار ته‌ها پارێزگارو محه‌مه‌د ئیبراهیم حافز سه‌رۆكی ئه‌نجومه‌نی پارێزگا و ژماره‌یه‌ك لێپرسراو و راوێژكاره‌وه‌ پێشوازی لێكرا.

سه‌ردانه‌كه‌ی سه‌رۆككۆماری عیراق بۆ كه‌ركوك به‌مه‌به‌ستی به‌شداری كردنه‌ له‌ساڵیادی كۆچی دوایی سه‌رۆك مام جه‌لال كه‌ ئه‌مساڵ ئه‌و یاده‌ له‌كه‌ركوك ده‌كرێته‌وه‌، له‌كاتێكدا ساڵی رابردوو یاده‌كه‌ له‌به‌غدا كرایه‌وه‌.

پێشتریش سه‌رۆككۆماری عیراق بڕیاریدابوو سه‌ردانی پارێزگاری كه‌ركوك بكات و پشتیوانی خۆی بۆ پارێزگاری نوێی كه‌ركوك ده‌رببڕێت، له‌و باره‌یه‌وه‌ عێزه‌دین مه‌جید محه‌مه‌د جێگری سه‌رۆكی دیوان له‌ سه‌رۆكایه‌تی كۆماری عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاندبوو: "سه‌ردانی نه‌كردنی د.له‌تیف جه‌مال ره‌شید سه‌رۆككۆماری عیراق بۆ پارێزگای كه‌ركوك له‌ماوه‌ی دوو ساڵی رابردوودا بۆئه‌وه‌ ده‌گه‌ڕ‌ێته‌وه‌ كه‌ ئاماده‌نه‌بووه‌ له‌گه‌ڵ راكان جبوری پارێزگاری سه‌پێندراوی كه‌ركوك كۆببێته‌وه‌و چاوی پێبكه‌وێت، چونكه‌ ناوبراو مه‌له‌فی گه‌نده‌ڵی و چه‌ندین یاساشكێنی له‌ دژی پێكهاته‌كانی شاره‌كه‌ كردووه‌".

"سه‌رۆككۆماری عیراق له‌سه‌ر رێبازی چه‌پكه‌ گوڵه‌كه‌ی سه‌رۆك مام جه‌لال پشتیوانی خۆی بۆ پارێزگار و ئه‌نجومه‌نی نوێی پارێزگاكه‌ ده‌رده‌بڕ‌ێت، هه‌روه‌ها چاره‌سه‌ری كێشه‌كان و پێكه‌وه‌ژیان و ئارامی شاره‌كه‌ی كردووه‌ته‌ ئه‌وله‌ویاتی كاره‌كانی و له‌و چوارچێوه‌یه‌شدا پشتیوانی حكومه‌تی خۆجێیی شاره‌كه‌ ده‌بێت"، عێزه‌دین مه‌جید محه‌مه‌د واده‌ڵێت.

ئه‌مڕۆ 3-10-2024 حه‌وته‌مین ساڵیادی كۆچی دوایی سه‌رۆك مام جه‌لال له‌كه‌ركوك به‌ڕێوه‌ده‌چێت كه‌ له‌لایه‌ن دامه‌زراوه‌ی سه‌رۆك جه‌لال تاڵه‌بانییه‌وه‌ یاده‌كه‌ ده‌كرێته‌وه‌و له‌یاده‌كه‌دا جگه‌ له‌ سه‌رۆككۆماری عیراق ژماره‌یه‌كی زۆر لێپرسراوی حكومی و حزبی له‌سه‌ر ئاستی عیراق و هه‌رێمی كوردستان به‌شداری یاده‌كه‌ ده‌كه‌ن.

PUKMEDIA