په‌رله‌مان بڕگه‌ی گه‌ڕانه‌وه‌ی موڵك و ماڵی بۆ خاوه‌نه‌كانیان له‌كارنامه‌كه‌ی لابرد

PUKMEDIA

ئەنجومەنی نوێنەرانی عیراق

سه‌رۆكایه‌تی په‌رله‌مانی عیراق ئه‌وخاڵه‌ی له‌كارنامه‌ی دانیشتنی سبه‌ینێ دا لابرد كه‌ تایبه‌ت بوو به‌ هه‌ڵوه‌شاندنه‌وه‌ی بڕیاره‌كانی مه‌جلسی قیاده‌ سه‌وره‌ بۆ گه‌ڕانه‌وه‌ی زه‌وی و موڵك ماڵ بۆ خاوه‌نه‌كانیان،  بڕیارده‌ری فراكسیۆنی یه‌كێتی له‌ئه‌نجومه‌نی نوێنه‌رانی عیراق ده‌ڵێت:" شیعه‌ و سووننه‌ ده‌یانه‌وێت ده‌نگدان له‌سه‌ر هه‌مواری یاسای لێبوردنی گشتی و یاسای باری كه‌سێتی و پرۆژه‌ یاسای گه‌ڕاندنه‌وه‌ی موڵك و ماڵ له‌یه‌ك رۆژدا بێت".


كاروان یاروه‌یس بڕیارده‌ری فراكسیۆنی یه‌كێتی له‌ئه‌نجومه‌نی نوێنه‌رانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA راگه‌یاند:" سه‌رۆكایه‌تی په‌رله‌مانی عیراق ئه‌و كارنامه‌یه‌ی پێشتر بڵاویكردبووه‌وه‌، بۆ دانیشتنی سبه‌ی سێ شه‌ممه‌ كشانده‌وه‌و كارنامه‌كه‌ی تری بڵاوكرده‌وه‌ كه‌ بڕ‌گه‌ی ده‌نگدانی له‌سه‌ر پرۆژه‌ یاسای گه‌ڕاندنه‌وه‌ی موڵك و ماڵ بۆ خاوه‌نه‌كانیان لابرد، كه‌ پێشتر به‌ بڕیارێكی مه‌جلیسی قیاده‌ سه‌وره‌ ئه‌و زه‌وییانه‌ داگیركرابوون".

" هه‌فته‌ی رابردوو سه‌ركرده‌و سه‌رۆكی فراكسیۆنه‌كانی شیعه‌ به‌ڵێنیان به‌ فراكسیۆنه‌ كوردستانیه‌كاندا ئه‌و پرسه‌ دوو رۆژ دوابخه‌ن بۆ ئه‌وه‌ی له‌دانیشتنی داهاتوو بخرێته‌ كارنامه‌ی دانیشته‌كانی په‌رله‌مانه‌وه‌ بۆ ئه‌وه‌ی سوونه‌كان رازی بكه‌ن، به‌ڵێنه‌كه‌یان نه‌برده‌ سه‌ر" كاروان یاروه‌یس واده‌ڵێت.

راشیگه‌یاند:"شیعه‌ و سووننه‌ ده‌یانه‌وێت ده‌نگدان له‌سه‌ر هه‌مواری یاسای لێبوردنی گشتی و یاسای باری كه‌سێتی و پرۆژه‌ یاسای گه‌ڕاندنه‌وه‌ی موڵك و ماڵ له‌یه‌ك رۆژدا بێت، بۆئه‌وه‌ی سوننه‌ و شیعه‌و كورد پابه‌ندی ده‌نگدان بن، به‌ڵام هه‌ر جاره‌و به‌بیانوویه‌ك رێگری ده‌كرێت له‌وه‌ی ئه‌و سێ پرسه‌ به‌یه‌كه‌وه‌ بێنه‌ په‌رله‌مان".

PUKMEDIA