سەرۆكی حكومەتی كۆتایی پێهێنراو ئیشەكەی قورستر كرد

PUKMEDIA

ستران عەبدوڵڵا

ستران عەبدوڵڵا

بیرم لێكردەوە قەیچێكە با ئەم جارە فەرەزندی ژن و پیاوێكی كرمانج، یان كوردێكی  خۆماڵی و خۆمانی لە ئەهلی كەسەبە و بازاڕ ببێتە سەرۆكی حكومەتی داهاتوو، كابینەی دەیەم لە سەدەی بیست و یەكەمدا .

خۆ ئەم وڵاتە پڕە لە بەهرە و توانای تاقیكراوە لە كۆڕی ژیان و … دەرفەت بۆ نەرەخساو لە هەیوانی سیاسەت و ریاسەتدا. با یەكێكی تر لە كچان و كوڕانی كوردەواری تاقیبكەینەوە.

كوردستانی  رەنگین و بوژاوە لە سروشت و لە سروت، دەوڵەمەند لە سەروەت و سامانی سەر زەوی و بن زەوی، كوردستانی دایك كە مام جەلال وتەنی قەت نەزۆك نەبوو و نییە، لەباری دایە سەرۆكی حكومەتێكی خەمخۆر و پەرۆش ، خەڵكی و خاكیمان پێشكەش بكات كە داهات و داهاتوومان پاشكەوت نەكات لە بیری تەنگ و تاریكی ئەژماری من و گیرفانی مندا.

ژینگەی دیموكراسی  و هەوای  هەڵبژاردن لەبارە و حزبەكەی ئامادەیە ئەم ژان و دەردە كۆتایی پێبێنێ و ئەم سەرۆك حكومەتە ناوزەد بكات. حزبەكە  قیت قیتە  و ژمارەی لە  ١٢٩ ی  لە تیر وپشكی كۆمسیۆنی باڵای هەڵبژاردنەكان وەرگرتووە. 

بەڵام وای لە حاڵی سەرۆكی داهاتووی حكومەت! ئیشەكەی قورسە و ئەركە دارایی و خەرجییەكەشی  تاقەت پروكێنە.

چونكە بە ڕاستی ئەوی ئێستامان  لە تاو ململانێی هەڵبژاردن و لە حەژمەتی كەمپینی ڕاستكردنەوەی باری لاری تیمەكەی، بەڕاست و چەپدا پرۆژە خەرج دەكا و جادە و كۆڵانان قیرتاو ئەفەرمێ.

بەڕاستی ( فیلمە هندییەكە) دوای هەڵبژاردن و كابینەی نوێ دەست پێدەكات. چونكە كابرا بە (پیكاب و بەرازیلی) وەعدی گەورە گەورەی ئەوتۆی داوە بە جۆرێك سەرۆكە باش و چاك و خاسەكەی كابینەی دەیەم ئەكەوێتە ژێر باری قورسەوە و ئیشەكەی دژوارە.

وەكو كۆتایی بە زۆر شت دێنین پێویستە كۆتاییش بەم فەرهەنگە دواكەوتووە  بێنین كە لەبەر باری لاری حزبی گۆشەگیر ، بە دەرزەن و بە پیكاب وەعد و بەڵێن بدرێت. ئەی چوار پێنج ساڵەكەی حوكمڕانی خۆت چیت دەكرد؟

PUKMEDIA