عیماد ئەحمەد : لەم هەڵبژاردنە یەکێتی پێدەنێتە قۆناغێکی نوێ

PUKMEDIA

عیماد ئەحمەد، لیپرسراوی بۆردی راگەیاندن و هۆشیاری

لێپرسراوی مەکتەبی راگەیاندن و هۆشیاری یەکێتی لەبارەی پرۆسەی بانگەشەی هەڵبژاردنەوە دەڵێت: "سەرخستنی یەکێتی و پرۆسەی هەڵبژاردن ئەرکی سەرەکیمانە و دەمانەوێت لەو رێگایەوە گۆڕانکاری لەدەسەڵاتدا بکەین و کەسی شیاو بخەینە شوێنی شیاو و پێ بنێینە قۆناغێکی نوێی حوکمڕانی".

عیماد ئەحمەد لێپرسراوی مەکتەبی راگەیاندن و هۆشیاری یەکێتیی نیشتمانیی کوردستان بۆ مایکی لیستی ١٢٩ی یەکێتی رایدەگەیەنێت: "هەموو هەم و غەم و کارێکی سەرەکی ئێمە لە مەکتەبی سیاسی و لە لیژنەی باڵای هەڵبژاردن سەرخستنی پرۆسەی هەڵبژاردنە بەبێ دەستێوەردان، چونکە دەتوانین لەرێگەی هەڵبژاردن دەستاودەستی دەسەڵات بکەین".

"یەکێتیی نیشتمانیی کوردستان ئەم هەڵبژاردنە بە چارەنوسساز بۆ گەلی کوردستان دەزانێت و لەو پێناوەدا کاردەکان بۆ بەدەستهێنانی سەرکەوتن، هەم بۆ ئەوەی خزمەتی وڵاتەکەمان بکەین و هەم گۆڕانکاری لەدەسەڵات بکەین و کەسی شیاو بخەینە شوێنی شیاو و رۆحی شەهیدەکانمان شاد بکەین و رێبازی مام جەلال کە کوردایەتی راستەقینەیە سەریبخەین، لەم هەلبژاردنەوە یەکێتی پێدەنێتە قۆناغێکی نوێ لەبەرێوەبردن و حوکمڕانی"، عیماد ئەحمەد وای وت.

لێپرسراوی مەکتەبی راگەیاندن و هۆشیاری ئەوەشی وت: "هەڵبژاردنی ئەمجارە و ئەرکی یەکێتی جیاوازە، بەرەو باشتر، کەنەوەیەکی نوێ هاتونەتە پێشەوەو ئێمەش وەک جیلی کۆن هاوکار و پشتیوانیان دەبین بۆ سەرخستنی یەکێتی".

PUKMEDIA