شێخ جەعفەر شێخ مستەفا: هەولێرو بەغدا كێشەكانیان لەچوارچێوەی دەستووردا چارەسەربكەن

نوسینكەی راگەیانی جێگری سەرۆكی هەرێم

شێخ جەعفەر شێخ مستەفا، جێگری سەرۆكی هەرێم و ستیڤن هیچن، باڵیۆزی بەریتانیا لە عیراق

رۆژی چوار شەممە ٢٠٢٤/٩/١٨ شێخ جەعفەر شێخ مستەفا، جێگری سەرۆكی هەرێمی كوردستان، پێشوازی لە ستیڤن هیچن، باڵیۆزی بەریتانیا لە عیراق كرد.

لە كۆبوونەوەكەدا، پەیوەندییەكانی بەریتانیا لەگەڵ عیراق و هەرێمی كوردستان، دوایین پێشهاتەكان و بارودۆخی سیاسی و ئەمنی ناوچەكە، پڕۆسەی چاكسازیی و رێكخستنەوەی پێشمەرگە، پرسی هەڵبژاردنی پەرلەمانی كوردستان و چارەسەركردنی كێشەكانی نێوان حكومەتی عیراق و هەرێم، باسیان لێوەكرا.

لە كۆبوونەوەكەدا، هەردوولا جەختیان لە بەردەوامبوون و بەرەپێدانی پەیوەندییەكانی بەریتانیا لەگەڵ عیراق و هەرێمی كوردستان كردەوە، هەروەها هاوڕابوون كە دەبێت كێشەكانی نێوان هەولێرو بەغدا لەسەر بنەمای گفتووگۆو لێكتێگەیشتن لە چوارچێوەی دەستوور چارەسەر بكرێن، لەپێناو سەقامگیری دۆخی سیاسی و ئابووریی و فەراهەمكردنی خۆشگوزەرانی بۆ هاووڵاتیان. 

چاكسازییەكانی وەزارەتی پێشمەرگەو خێراكردنی پڕۆسەی یەكخستنەوەی هێزی پێشمەرگە، لەگەڵ پرسی هەڵبژاردنی پەرلەمانی كوردستان و بەڕێوەچوونی پڕۆسەكە لە كەشێكی ئارام و سەقامگیر، تەوەرێكی دیكەی گفتووگۆكان بوو.

PUKMEDIA