د.نەرمین مەعروف: وەفدەكە تاوتوێی ئەو كێشەو تێبینیانە دەكات كە لەلیستی مووچەدا ھەن

PUKMEDIA

د.نەرمین مەعروف ئەندامی لیژنەی دارایی ئەنجومەنی نوێنەرانی عیراق

وەفدێكی وەزارەتی دارایی عیراق بەسەرۆكایەتی تەیف سامی دێتە ھەرێم و كێشە و تێبینییەكان لە لیستی مووچەدا تاوتوێدەكەن، ئەندامێكی لیژنەی دارایی ئەنجومەنی نوێنەرانی عیراقی رایدەگەیەنێت: "خێرایی چارەسەركردنی كێشەكانی نێوان ھەرێم و عیراق كاریگەری لەسەر خێرا دابەشكردنی مووچەی مانگی ئاب دەبێت".

د.نەرمین مەعروف ئەندامی لیژنەی دارایی ئەنجومەنی نوێنەرانی عیراق بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "چاوەڕواندەكرێت رۆژی شەممە 7-9-2024، وەفدێكی وەزارەتی دارایی عیراق بەسەرۆكایەتی تەیف سامی بێتە ھەرێم  و لەگەڵ وەفدی وەزارەتی دارایی ھەرێم تاوتوێ ئەو كێشەو تێبینییانە بكەن كە لەلیستی مووچەدا ھەن، وەك بایۆمەتری و ناوی لێكچوو، ھەروەھا ئەو مووچانەی دراون بە ناوچە جێناكۆكەكان و چەندین بابەتی دیكە".

"هەر بۆ ئەومەبەستە وەزارەتی دارایی ھەرێم لیژنەیەكی پێكھێناوە بۆ ئامادەكردنی ئەجێنداكان، تا لە كۆبوونەوەكەیان لەگەڵ وەفدەكەی وەزارەتی دارایی عیراق گفتوگۆی لەبارەوە بكەن" د. نەرمین مەعروف وایوت.

راشیگەیاند: "خێرایی چارەسەركردنی كێشە ھەڵپەسێردراوەكانی نێوان ھەرێم و عیراق كاریگەری لەسەر خێرا دابەشكردنی مووچەی مانگی ئابی مووچەخۆرانی هەرێم دەبێت".

PUKMEDIA