بریندارانی 17ی شوبات خاوەندارێتی دۆسیەكەیان دەدەنە یەكێتی

PUKMEDIA

کۆبوونەوەی بریندارانی 17ـی شوبات و وەفدێکی یەکێتی

بریندارانی رووداوەكانی 17ی شوباتی 2011 و رۆژانی دوایی، خاوەندارێتی دۆسیەكەیان دەدەنە یەكێتیی نیشتمانیی كوردستان بۆ یەكلاكردنەوەی كەیسەكانیان، راوێژكاری سەرۆكی یەكێتیش دەڵێت: "بریندارەكان ئەو سكاڵایانەی كەلەسەر پارتی دیموكراتی كوردستان هەیانە داوای یەكلا كردنەوەی دەكەن".

بێستون فایەق راوێژكاری بافڵ جەلال تاڵەبانی سەرۆكی یەكێتیی نیشتمانیی كوردستان بەوێبسایتی رەسمی یەكێتی PUKMEDIA ی راگەیاند: "بریندارانی رووداوەكانی 17ی شوبات و رۆژانی دوایی، یەكێتی بە سەنگەری خۆیان دەزانن و لەڕێی یەكێتییەوە لەمەولا داواكارییەكانیان دەگەیەنن، بۆ لەمەودواش كەیسی 17ی شوبات و خواست و داواكارییەكان لەڕێگەی یەكێتییەوە خاوەندارێتی دەكرێت".

"بریندارانی ئەو ئەوكاتە، ئیدی لەڕێی یەكێتییەوە پەیامەكانیان دەگەیەنن و تەنیا یەكێتی بە خاوەنی راستەقینەی دۆسییەكەیان دەزانن و رێگەنادەن ھیچ حیزب و لایەنێكی دیكە خۆیان بكەنە خاوەنی كەیسەكەیان" بێستون فایەق وادەڵێت.

راشیگەیاند: "لەڕێگەی یەكێتییەوە بریندارەكانی 17ی شوبات سەرجەم ئەو سكاڵایانەی كەلەسەر پارتی دیموكراتی كوردستان هەیانە داوای یەكلا كردنەوەی دەكەن و داواشدەكەن تۆمەتبارانی ئەو رووداوە بدرێنە دادگا، بۆ ئەمەش تەنها ئەو خاوەندارێتییە دەدەنە یەكێتی".

رۆژی 17ی شوباتی ساڵی 2011، خۆپیشاندانێكی جەماوەری لە شاری سلێمانی  كرا، بەڵام بەهۆی تەقەكردن و توندوتیژییەوە لەلایەن لقی چواری پارتی دیموكراتی كوردستانەوە لە شەقامی سالم لە سلێمانی، چەند گەنجێك  كوژران و  ‌و زیاتر لە 35 كەسی دیكەش بریندار بوون،  خۆپیشاندانەكان چەند ناوچەیەكی دیكەی گرتەوە ‌و بۆ ماوەی زیاتر لە دوو مانگ درێژەی كێشا و سەرباری ئەوەی سكاڵای یاسایی لەسەر تۆمەتبارانی لقی چواری ئەو حزبە تۆماركراوە، بەڵام كەیسەكە بێ ئەنجام بووە.

PUKMEDIA