وەزیری داد: پشتیوانی ئیدارەی کەرکوکین بۆ پێشکەشكردنی باشترین خزمەتگوزاری

PUKMEDIA

پارێزگاری کەرکوک و وەزیری داد

وەزیری دادی عیراق سەردانی ديوانی پارێزگای کەرکوکی كرد و لەگەڵ پارێزگاری كه‌ركوك کۆبوەوەو رایگەیاند: 'کاردەکەین بۆ چارەسەری کیشەکان هەتا باشترین خزمەتگوزاری پێشکەش بە هاوڵاتیانی کەرکوک بکرێت و  بناغەکانی پێکەوەژیان بچەسپێنرێت'.

بەیانی ئەمڕۆ یەک شەممە 1-9-2024 د.خالید شوانی وه‌زیری داد سه‌ردانی ديوانی پارێزگای کەرکوکی كرد و لەگەڵ ڕێبوار تەها پارێزگاری كه‌ركوك و لێپرسراوان لە پارێزگا کۆبوونەوەیەکی ئەنجامداو لە کۆنگرەیەکی رۆژنامەوانیدا وەزیری داد رایگەیاند: "کاردەکەین بۆ چارەسەرکردنی کێشە و گرفتەکانی تایبەت بە پارێزگای کەرکوک، بۆ ئەوەی بتوانرێت باشترین خزمەتگوزارییەکان پیشکەش بە هاوڵاتیانی ئەم پارێزگایە بکرێت".

"سەردانی ئەمڕۆمان بۆ کەرکوک بەمەبەستی هەماهەنگی و هاوکاریکردنی پارێزگاکەیە، چونکە بە کاری هاوبەش دەتوانین باشترین پرۆژە پێشکەش بەم پارێزگایە بکەین و ئامانجەکانمان بەدی بێنین، پیرۆزباییش لە پارێزگار و دەستەی بەڕێوەبردنی ئەنجومەنی پارێزگا دەکەین"، د.خالید شوانی وای وت.

وەزیری داد راشیگەیاند: "حکومەتی کەرکوک لەدوای زنجیرەیەک کۆبوونەوە و دیالۆگی دوورودرێژ پێکهاتوەو ئێمە کاردەکەین بۆ پەرەپێدانی پەیوەندیی ئاشتیانە و برایانە، کەرکوک وەک هێمای پێکەوەژیانی ئاشتیانە دەمێنێتەوە و ناسنامەی خۆمان وەک کەرکوک دەپارێزین و هەمەچەشنی کەرکوک سەرچاوەی هێزە بۆ ئەم پارێزگایە و هەوڵەکانمان چڕدەکەینەوە بۆ دابینکردنی پڕۆژە و ڕەخساندنی هەلی کار و قوڵکردنەوەی گیانی هاوکاری لەنێوانماندا و گەشبینین بەئایندەی کەرکوک".

PUKMEDIA