كاندیده‌كانی یه‌كێتی مه‌رجه‌كانی كۆمسیۆنیان تێپه‌ڕاند

PUKMEDIA

پەرلەمانی کوردستان و لۆگۆی یەکێتی

كاندیده‌كانی یه‌كێتیی نیشتمانیی كوردستان له‌هه‌ر چوار بازنه‌كه‌ی هه‌ڵبژاردنی په‌رله‌مانی كوردستان هیچ كێشه‌یه‌كیان نییه‌و سه‌رجه‌میان مه‌رجه‌كانی كاندیدبوونیان تێدایه‌و ده‌ستپاك و بێ پێشینه‌ی تاوانن.

یه‌كێتیی نیشتمانیی كوردستان به‌ 172 كاندید به‌شداری له‌هه‌ڵبژاردنی خولی شه‌شه‌می په‌رله‌مانی كوردستاندا ده‌كات كه‌ بڕیاره‌ رۆژی 20-10-2024 به‌ڕێوه‌بچێت.

هیچ كاندیدێكی یه‌كێتی دوورنه‌خرایه‌وه‌

سه‌رچاوه‌یه‌ك له‌ مه‌كته‌بی هه‌ڵبژاردنه‌كانی یه‌كێتیی نیشتمانیی كوردستان به‌ وێبسایتی ره‌سمی یه‌كێتی PUKMEDIA ی راگه‌یاند:" كاندیده‌كانی یه‌كێتی سه‌رجه‌م ئه‌و مه‌رجانه‌یان تێدایه‌ كه‌ كۆمسیۆنی سه‌ربه‌خۆی هه‌ڵبژاردنه‌كانی عیراق دیاریی كردوه‌و هیچ كاندیدێكی یه‌كێتی دوورنه‌خراونه‌ته‌وه‌".

"دوای به‌دواداچوون و وردبینی بۆ كاندیده‌كان له‌لایه‌ن ده‌زگا تایبه‌تمه‌نده‌كانی عیراق و هه‌رێمی كوردستانه‌وه‌، كاندیده‌كانی یه‌كێتی سه‌رجه‌میان مه‌رجه‌كانی كاندیدبوونیان تێدابووه‌و به‌شداری هه‌ڵبژاردن ده‌كه‌ن"، سه‌رچاوه‌كه‌ی مه‌كته‌بی هه‌ڵبژاردنه‌كانی یه‌كێتی واده‌ڵێت.

مه‌رجه‌ سه‌ره‌كییه‌كانی كاندیدبوون

به‌پێی مادده‌ی 5ی سیستمی تۆماركردن و په‌سه‌ندكردنی لیست و كاندیده‌كانی هه‌ڵبژاردنی په‌رله‌مانی كوردستانی عیراق به‌ ژماره‌ 7ی ساڵی 2024ی هه‌مواركراو، پێویسته‌ كاندیده‌كان مه‌رجی ده‌ستپاكییان هه‌بێت، هه‌روه‌ها حوكم نه‌درابێت به‌ تاوانه‌كانی ئابڕوبه‌ری و لادان له‌داب و نه‌ریتی گشتی، هاوكات حوكم نه‌درابێت به‌ تاوانه‌كانی كوشتنی به‌مه‌به‌ست و دزی كردن، له‌گه‌ڵ ئه‌وه‌شدا به‌شداری له‌تاوانه‌كانی رژێمی دیكتاتۆری پێشووی عیراق نه‌كردبێت.

یه‌كێتی به‌ 172 كاندید به‌شداری هه‌ڵبژاردن ده‌كات

به‌پێی ئاماره‌كانی مه‌كته‌بی هه‌ڵبژاردنه‌كانی یه‌كێتی كه‌ ده‌ست PUKMEDIA كه‌وتووه‌،" یه‌كێتی بۆ هه‌ڵبژاردنی خولی شه‌شه‌می په‌رله‌مانی كوردستان 172 كاندیدی هه‌یه‌و له‌و ژماره‌یه‌ 72 كاندیدیان له‌ بازنه‌ی سلێمانی و 64 كاندیدیشیان له‌ بازنه‌ی هه‌ولێر و 30 كاندیدیشی له‌ بازنه‌ی دهۆكه‌و بازنه‌ی هه‌ڵه‌بجه‌ش 6 كاندیدی هه‌یه‌".

بۆ هه‌ر بازنه‌یه‌ك سه‌رۆك لیستێك هه‌یه‌

بۆ هه‌ر بازنه‌یه‌كیش سه‌رۆك لیستی خۆی هه‌یه‌و بۆ بازنه‌ی هه‌ولێر شاڵاو كۆسره‌ت ره‌سوڵ و بۆ بازنه‌ی سلێمانی د. میران محه‌مه‌د و بۆ بازنه‌ی دهۆكیش عه‌لی ئۆره‌ماری و بۆ بازنه‌ی پارێزگای هه‌ڵه‌بجه‌ش به‌رزان عوسمان-ی دیاریكردووه‌.

یه‌كێتی 62 كاندیدی ژنی هه‌یه‌

رێژه‌ی كاندیدكردنی ژنان له‌لیسته‌كانی یه‌كێتیی نیشتمانیی كوردستاندا رێژه‌كه‌ی له‌ 30% زیاتره‌و له‌كۆی ژماره‌ی كاندیده‌كانی 62 كاندیدی ژنه‌، به‌شێوه‌یه‌ك له‌بازنه‌ی هه‌ولێر 24 كاندیدو له‌ بازنه‌ی سلێمانی 26 كاندیدو له‌دهۆك 10 كاندید و له‌ پارێزگای هه‌ڵه‌بجه‌ 2 كاندیدی ژنه‌.

وته‌بێژی كۆمسیۆن: ووردبینی له‌ناوی كاندیده‌كان كراوه‌

له‌باره‌ی وردبینی ناوی كاندیده‌كانیشه‌وه‌ جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "پێشتر ناوی كاندیدانی خولی شه‌شه‌می په‌رله‌مانی كوردستان به‌ مه‌به‌ستی وردبینی ئاڕ‌استه‌ی لایه‌نی تایبه‌تمه‌ند كرابوون و له‌ئێستادا ناوه‌كان گه‌ڕ‌اونه‌ته‌وه‌ بۆ كۆمسیۆن".

"دوای گه‌ڕ‌انه‌وه‌ی ناوی كاندیده‌كان، بڕ‌یاره‌ كۆمسیۆن له‌لایه‌ن به‌شی كاروباری كاندیده‌كان و فه‌رمانگه‌ی یاساییه‌وه‌ جارێكی دیكه‌ وردبینی بۆ وه‌ڵامی لایه‌نه‌ په‌یوه‌ندیداره‌كان له‌باره‌ی ناوه‌كانه‌وه‌ بكات"، وته‌بێژی كۆمسیۆن وای وت.

رۆژی 26-6-2024 سه‌رۆكی هه‌رێمی كوردستان پێنجه‌مین مه‌رسومی هه‌رێمی بۆ دیاریی كردنی واده‌یه‌كی نوێ بۆ هه‌ڵبژاردنی خولی شه‌شه‌می په‌رله‌مانی كوردستان دیاریی كرد كه‌ رۆژی 20-10-2024 یەو ئاماده‌كارییه‌كانی كۆمسیۆنی باڵای سه‌ربه‌خۆی هه‌ڵبژاردنه‌كانی عیراقیش به‌رده‌وامه‌ بۆ به‌ڕ‌ێوه‌بردنی هه‌ڵبژاردنه‌كه‌.


PUKMEDIA