پارێزگاری كەركوك: ماڵی هیچ هاووڵاتییەك ناڕوخێندرێت

PUKMEDIA

رێبوار تەها پارێزگاری کەرکوک

رێبوار تەها پارێزگاری كەركوك رایدەگەیەنێت: "ماڵی هیچ هاووڵاتییەكی كەركوك ناڕوخێنین، بەڵكو رێكارەكانمان تەنها ئەو دەڵاڵانە دەكەنە ئامانج كە دەست بەسەر دۆنمەكاندا دەگرن و پلان بۆ فرۆشتنی دادەنێن"، دەشڵێت: "چیتر بەرامبەر بەوكەسانە بێدەنگ نابین كە ناهێڵن زەوییەكان بكرێنە پڕۆژەی خزمەتگوزاری نوێ و قوتابخانە و بنكەی تەندروستی لە كەركوك".

بەپێی راگەیەندراوێكی نوسینگەی رێبوار تەها پارێزگاری كەركوك كە كۆپییەكی بۆ PUKMEDIA نێردراوە راگەیەندراوە: "لە میانەی بەدواداچوونەكانیدا بۆ كاری دامودەزگا رەسمی و خزمەتگوزارییەكان لە كەركوك، پارێزگاری شارەكە پشتراستی كردەوە كە ئیدارەی كەركوك ماڵی هیچ هاووڵاتییەكی كەركوك ناڕوخێنێت، بەڵكو رێوشوێن هەیە كە دەڵاڵ و دزەكان دەكاتە ئامانج كە دەست بەسەر دۆنمی زەویدا دەگرن و دەیبڕن بۆ فرۆشتن بۆ ئەوەی هەژاران تێوەگلێنن".

دەشڵێت: "ئێمە رێگا نادەین دەڵاڵی زەوی و مافیاكان خراپ بەكارهێنانی سامانی گشتی بكەن بۆ دەستكاریكردن و ئیستغلالكردنی بەرژەوەندی هاووڵاتیانی بەشەرەف و خەڵكی هەژار، بۆ ئەوەی زیانیان پێ بگەیەنن".

لەراگەیەندراوەكەدا ئاماژەی بەوەشكردووە: "كە ئێمە رێنماییمان داوەتە فەرماندەیی پۆلیسی كەركوك و لیژنە پەیوەندیدارەكانمان ئاگادار  كردووەتەوە بۆ گرتنەبەری رێوشوێنی یاسایی دژی ئەو باندانەی كە دەست درێژی دەكەنە سەر زەوییەكانی دەوڵەت، چیتر بێدەنگ نابین بەرامبەر ئەو نەفس نزمانە  كە زەوییان دابڕیوە بۆ ئەوەی نەكرێتە پڕۆژەی خزمەتگوزاری نوێ و قوتابخانە و بنكەی تەندروستی لە كەركوك".

PUKMEDIA