ئاسایش تیرۆرستێک دەستگیردەکات

PUKMEDIA

ئاسایش

دەزگای ئاسایشی هەرێم، بەڵگە ڤیدیۆیی دانپێدانانی ئەو تیرۆریستەی د*اع*ش کە لە قەرەهەنجی دەستگیرکرا بڵاودەکاتەوە کەزیاترلە (٢٥)ئەندامانی هێزە ئەمنییەکانی کردوەتە ئامانج.

دەزگای ئاسایشی هەرێم لە راگەیەندراوێکدا کە کۆپییەکی بۆ وێبسایتی رەسمی یەکیتیی نیشتمانیی کوردستان PUKMEDIA ناردووە رایگەیاند: "دوای ئەوەی ٢٠٢٤/٧/١٤ ڕووبەڕوبوونەوەیەکی چەکداری لە نێوان ژمارەیەک تیرۆریستی د*ا*ع*ش لەگەڵ هێزەکانی ئاسایش لەناحیەی قەرەهەنجیری سەربە پارێزگای کەرکوک روویدا، لەڕووبەڕووبوونەوەکەدا (جوامێر عەزیز ڕەشید )کارمەندی ئاسایش شەهیدبوو و کارمەندێک برینداربوو، هاوکات تیرۆریستێکی د*ا*ع*ش کوژراو و تیرۆریست ( حەیدەر کەریم )بەبرینداری دەستگیرکرا و دەستبەجێ لەتۆڵەی شەهید (جوامێر عەزیز) بەفڕۆکەی جەنگی (F-16)مۆڵگەکانی تیرۆریستان لەچیای زەمبوور خاپوورکران، ئۆپراسیۆنەکە بەهامەهەنگی بەرێوەبەرایەتی گشتی ئۆپراسێونەکانی ئاسایش و دەزگای ئاسایشی نیشتمانی عێراق و (خليه مكافحه الارهاب) و بەرێوەبەرایەتی ئاسایشی کەرکوک لەگەڵ ژووری ئۆپراسیۆنەکانی کەرکوک ئەنجامدرا".

"دوای لێکۆڵینەوە لەگەڵ تیرۆریستی دەستگیرکراو دانی بەچەندین تاواندا ناوە و بەرێوەبەرایەتی گشتی ئۆپراسێونەکانی ئاسایش سەرجەم بەڵگە ڤیدیۆ و زانیاری لەسەر کردە تیرۆریستیەکانیان بڵاودەکاتەوە، کە زیاتر لە (٢٥) ئەندامی هێزە ئەمنییەکانی عێراق و کوردستانیان کردوەتە ئامانج، جێگەی مەترسی بوون بۆ هاوڵاتیانی سنووری کەرکوک و دەوروبەری"، لەراگەیەندراوەکەی ئاسایشدا هاتووە.

ئاماژە بەوەش کراوە: "هەر لەئەنجامی دانپێدانان و لێکۆڵینەوەکان هێزەکانی بەرێوەبەرایەتی گشتی ئۆپراسێونەکانی ئاسایش، توانیان لەکەرکوک تیرۆریست (عەلی عەبدوڵڵا) دەستگیربکەن و دواتر لەناوچەی ڕەشاد تیرۆریست (مخلف زگاع ئەلگاقوڵی) دەستگیربکەن، هاوکات لە ئۆپراسێونێکی تردا لەناحیەی قەرەهەنجیر و گوندی چیمەن تیرۆریستان(زيدان خلف الياس و نزهان زيدان خلف)دەستگیرکران، لەسەر بنەمای زانیاری پێشوەختە و لەئەنجامی لێکۆڵینەوەکان پارێزگای هەڵەبجە تیرۆریست(علاء شجاعی)لەلایەن هێزەکانی بەڕێوەبەرایەتی ئۆپراسێونەکان دەستگیرا و سەرجەم تیرۆریستان ڕووبەڕووی یاسایان کرانەوە، لەئێستادا هەر(٦) تیرۆریست بەماددەی(٢)ی تیرۆر دەستگیرکراون و لێکۆڵینەوە لەدۆسیەکانیان بەردەوامە".

PUKMEDIA