هاتن و ماڵئاوایی كونسوڵی ئەمریكا لەهەولێر بە هەواڵی "پێشێلكاریی ئازادی" بوو

ئاژانسەكان

مارك سترۆ كونسوڵی گشتی پێشووی ئەمریكا لەهەولێر

مارك سترۆ كە كونسوڵی گشتی ئەمریكابوو لە هەولێر كۆتایی بە ئەركەكەی هات و ستیڤ بیتنەر جێگەی دەگرێتەوە، هەردوو دیپلۆماتكارە ئەمریكییەكە سەردانی ژمارەیەك لێپرسراوی حزبی و حكومییەكانی هەرێمیان كرد، ستیڤ بیتنەر وەك خۆناساندنی لە ئەركی نوێیدا و مارك سترۆ بۆ ماڵئاوایی.

سترۆ لەهاتن و رۆیشتنیدا هەواڵی كێشەی ئازادی رۆژنامەنووسی لەهەرێم بیست

خاڵێ هاوبەشی هاتن و ماڵئاوایی مارك سترۆ ئەوەیە كە" هەواڵی كێشەی ئازادی رۆژنامەنووسی لە هەرێم دەبیستێت"، ئەو كە پێی خستەناو خاكی هەرێمەوە، هەواڵی رفاندنی سێ رۆژنامەنووس لەدهۆك و هەولێری پایتەخت و خۆپیشاندانی فراوان بۆ ئازادكردنی رۆژنامەنووسانی بادینان و مانگرتنی رۆژنامەنووسێكی زیندانیكراو، گەرمترین رووداوی رۆژبوون كە تایبەتن بە ئازادی رۆژنامەنووسی لە رۆژی 23/8/2023، ئێستاش كە خاكی هەرێم بەجێدەهێڵیت هەواڵی ئازادی رۆژنامەنووسی ئەوەیە كە لە دهۆك رێگری كرا لە یادكردنەوەی تیرۆركردنی وەدات حسێنی رۆژنامەنووس  كە ئێوارەی 13/8/2024  خانەوادەی بە هاوبەشی لەگەڵ كۆمەڵێك رۆژنامەنووس و چالاكوانی مەدەنی بادینان  بەنیازبوون یادی هەشتەمین ساڵەی تیرۆركردنی بكەنەوە، بەڵام رێگە نەدراو ژمارەیەك رۆژنامەنووس و چالاكوانیش دەستگیركران.

سترۆی دیپلۆماتكار و راگەیاندنكار پەیامێكی لەرێی پەیجی رەسمی كونسوڵخانەی ئەمریكا لە هەولێر بڵاوكرووەتەوە و دەڵێت:" لە ماوەی ساڵی رابردوودا لەگەڵ كۆمەڵگای مەدەنی هاوبەشییمان پێكهێنا بۆ پێشخستنی مافەكانی ژنان، بەرەنگاربوونەوەی توندوتیژیی ڕەگەزی، هەمەچەشنكردنی ئابوری، هاندان و بیرۆكەبەخشین بە كارسازانی داهاتوو، پێشخستنی ئازادیی راگەیاندن...".

 "پەیوەندیی نێوان ویلایەتەیەكگرتووەكانی ئەمریكا و خەڵكی هەرێمی كوردستان  دەگەڕێتەوە بۆ دەیان ساڵ لەمەوبەر، كە قوربانیدانی هاوبەش پێكی هێناوە و بە بەها هاوبەشەكان بەهێزكراوە". سترۆ وادەڵێت

مارك سترۆ لە چەندین رۆژنامە و هەفتەنامەی وەك (رۆژنامەی فیلادێلفیا ئینكویرەر وەك پەیامنێر لەساڵی 2000-2002 كاریكردووە و خاوەنی بەكارلۆریۆسە لەمێژوو و زانستە سیاسییەكان لە كۆلێژی ڕاندۆڵف-ماكۆن، هەروەها خاوەنی بڕ‌وانامەی ماستەرە لە بواری رۆژنامەگەری لە زانكۆی كۆڵۆمبیا.

لەرۆژی لە 14ی ئابی 2024 لە هەولێر قوباد تاڵەبانی جێگری سەرۆكوەزیرانی هەرێم ستایشی كارەكانی مارك سترۆی كرد و پێیوت: "رۆڵی باشت بینیوە لە بوارەكانی مافی مرۆڤ و ئازادی رادەربڕین و هاوكاریكردنی رێكخراوەكانی كۆمەڵگای مەدەنی لە كوردستان".

قوباد تاڵەبانی و مارك سترۆ: هەرێم لەرووی ئازادی رادەربڕ‌‌ین و رۆژنامەگەرییەوە پاشەكشە نەكات

 یەكەمین دیداری دیپلۆماسی قوباد تاڵەبانی جێگری سەرۆكوەزیرانی هەرێم و  مارك سترۆ كە وەك كونسوڵی نوێی ئەمریكا دەستبەكاربوو باسەكانیان "ئازادی رۆژنامەنووسی" تێدابووە، هەردووكیان دووپاتیان كردەوە كە "نابێت هەرێم لەرووی ئازادی رادەربڕ‌‌ین و بواری رۆژنامەگەرییەوە پاشەكشە بكات، بەڵكو دەبێت پەیوەندییەكی تەندروست و پیشەییانەتر لەنێوان دەسەڵاتی سیاسی و میدیادا هەبێت و پەرەی پێبدرێت".

سترۆ: تامەزرۆی هاتنی هەڵبژاردنێكی ئازادو دادپەروەرین

 سترۆ لە پەیامی ماڵئاواییەكەیدا نوسیویەتی: "بە خۆشحاڵییەوە دەڕوانینە كاری پێكەوەیی بۆ باشتركردنی ژینگەی هەرێمی كوردستان بۆ كۆمەڵگای مەدەنی و كاری میدیا و  بە تامەزرۆییەوە چاومان لەسەر هاتنی هەڵبژاردنێكی ئازاد و دادپەروەر و شەفاف و گشتگیرە كە لە مێژە چاوەڕوان كراوە و لە 20ی تشرینی یەكەمی ئەم ساڵ ئەنجامدەدرێت".

سترۆ سوپاسی خەڵكی هەرێمی كوردستان دەكات

لە پەیامەكەیدا سترۆ دەڵێت: "پێكەوە پێشكەوتنمان لە چاكسازیی هێزەكانی پێشمەرگە بەدەستهێناوە كە ئەركێكی بنەڕەتییە لە دابینكردنی ئاسایشی درێژخایەن بۆ هەرێمی كوردستان و لایەنێكی بنچینەیی ئەو هاوبەشییە دوورمەودایەیە كە لە بواری ئاساییشدا لەگەڵ عیراق و هەرێمی كوردستان هەمانە"،  مارك سترۆ سوپاسی خەڵكی هەرێمی كوردستان  دەكات بۆ میوانداریی قەشەنگیان و هاوبەشكردنی كەلتورە دەوڵەمەندو هەمەڕەنگەكەیان لەگەڵیدا، دەشڵێت: "خزمەتكردنم لێرە وەكو كونسوڵی گشتیی كونسوڵخانەی ئەمریكا شانازی و ئیمتیازێكی گەورە و مەزن بووە".
 

ئێستا ستیڤ بیتنەر كونسوڵی گشتی ئەمریكایە لە هەولێر،  لە ساڵی 2003-2004  راوێژكاری سیاسی دەسەڵاتی كاتی هاوپەیمانی (CPA)لە شارەكانی رومادی و حللە لە عیراق لە ساڵی 2003 تا 2004، ە لە سلكی دیپلۆماسیدا لە باڵیۆزخانەی وڵاتەكەی لە ئەسینا و قودس كایكردووە،  چەندین ئەركی دیكەی هەبووە لەناو سكرتاریبەتی جێبەجێكاری وەزارەتی دەرەوە لە واشنتۆن و جگە لە ئینگلیزی، زمانی عەرەبی و پۆڵەندی و هۆڵەندی دەزانێت.


PUKMEDIA