پیرە: ڕێبوار تەها پارێزگاری چەپکە گوڵەکەو هەموو ڕەنگەکانی کەرکوکە

PUKMEDIA

سەعدی ئەحمەد پیرە، وتەبێژی یەکێتی

وتەبێژی یەکێتی پەیامێکی پیرۆزبایی بۆ پارێزگاری هەڵبژێردراوی کەرکوک بڵاودەکاتەوەو رایدەگەیەنێت: " ڕێبوار تەها پارێزگاری چەپکە گوڵەکە و هەموو ڕەنگەکانە و بە کردەوەکانی کەرکوک و سیاسەت و یەکێتی جوان دەکات".

سەعدی ئەحمەد پیرە، وتەبێژی یەکێتیی نیشتمانیی کوردستان بۆ پارێزگاری هەڵبژێردراوی کەرکوک پەیامێکی بڵاوکردەوەو ڕایگەیاند: "بەبۆنەی کۆتایی هاتنی ئەم پرۆسەیە و دانانی کەرکوکییەک بۆ پۆستی پارێزگاری کەرکوک پیرۆزبایی لە هەموو کەرکوکییەکان بە عەرەب و تورکمان و کوردەوە دەکەم".

"یەکێتی بەڵێنی داوە بەوەی بەشداری کردووە یان نا، ڕێبوار تەها پارێزگاری هەموو کەرکوکییەکانە و ئەوانەی ویستیان تۆوی دوو بەرەکی بچێنن، ڕێبوار بە کردەوەی خۆی و بە خزمەتەکانی ئەم گومانە لە گۆڕ دەنێت و بە زووترین کات هەمووان بۆیان دەردەکەوێت کە یەکێتی وەکو هەمیشە خاوەنی وەعد و بەڵێنی خۆیەتی و خۆی بچوک ناکاتەوە بەوەی تەنها نوێنەری یەکێتییەکان بێت و نوێنەری هەموو کەرکوکییەکان دەبێت و پیرۆزبایی لە هەمووان دەکەم"، سەعدی پیرە وادەڵێت.

وتەبێژی یەکێتی ئاماژەی بەوەشکرد: "ڕێبوار تەها پارێزگاری چەپکە گوڵەکە و هەموو ڕەنگەکانە و بە کردەوەکانی کەرکوک و سیاسەت و یەکێتی جوان دەکات".

PUKMEDIA