71 لیست و کاندید بۆ هەڵبژاردن ژمارەیان پێدرا

PUKMEDIA

ئەنجامدانی تیروپشک بۆ کاندید و لیستەکان

تیروپشک بۆ ژمارەدان بە لیست و هاوپەیمانێتی و کاندیدانی بەشدار لە هەڵبژاردنی پەرلەمانی کوردستان بەڕێوەچوو، تێیدا ژمارە بە 71 لیست و هاوپەیمانێتی و کاندید درا و سەرۆکی کۆمسیۆنیش رایگەیاند: "دڵنیایی دەدەین هەڵبژاردنێکی بێلایەن و پیشەییانە بەڕێوەدەچێت".

حاکم عومەر ئەحمەد سەرۆکی کۆمسیۆنی باڵای سەربەخۆی هەڵبژاردنەکانی عیراق لەمیانی بەرێوەچونی تیروپشکەکەدا رایگەیاند: "دڵنیایی دەدەینە هاوڵاتیانی هەرێم هەڵبژاردنی خولی شەشەمی پەرلەمانی کوردستان بەوپەڕی پیشەییانە و بێلایەنانە بەرێوەدەچێت".

"سبەینێ 11ـی 8ـی 2024، سەعات 10ـی بەیانی لە هۆتێل هەولێری نێودەوڵەتی، تیروپشک بۆ کارمەندانی سەر سندوقەکانی دەنگدان دەکرێت و لەم هەفتەیەدا لەهەولێر چەند چالاکییەک پەیوەست بە هەڵبژاردن بەڕێوەدەچێت"، سەرۆکی کۆمسیۆن وایوت.

پێشتر لە تیروپشکێکدا رۆژی 8-4-2024 ژمارە بە هاوپەیمانێتی و لیست و کاندیدانی بەشدار لە هەڵبژاردنی پەرلەمانی کوردستان درا و یەکێتیی نیشتمانیی کوردستانیش وەک حزبێکی سەربەخۆ ژمارە 129ی پێدراوە، کە بە 172 كاندید بەشداری هەڵبژاردن دەکات کە له‌و ژماره‌یه‌ 72 كاندیدیان له‌ بازنه‌ی سلێمانی و 64 كاندیدیشیان له‌ بازنه‌ی هه‌ولێر و 30 كاندیدیشی له‌ بازنه‌ی دهۆكه‌و بازنه‌ی هه‌ڵه‌بجه‌ش 6 كاندیدی هه‌یه‌.

PUKMEDIA