دەزگای ئاسایش: لەرووداوەکەی قەرەداغ دوو کارمەندمان شەهیدبوون

PUKMEDIA

لۆگۆی ئاسایش

دەزگای ئاسایش روبەڕوبونەوەی نێوان مەفرەزەکانی ئاسایش و چەند چەکدارێک لە ناوچەی قەرەداغ رادەگەیەنێت، کەبەهۆیەوە دوو کارمەندی ئاسایش شەهید دەبن.

دەزگای ئاسایشی ھەرێم لە ڕاگەیەنراوێکدا کە کۆپییەکی بۆ وێبسایتی رەسمی یەکێتیی نیشتمانیی کوردستان PUKMEDIA نێردراوە ڕایگەیاند: "سەعات ٥ی پاشنیوەڕۆی ئەمڕۆ ٢٠٢٤/٨/٩ لە ناوچەی (قەرەداغ) دوای ئەوەی مەفرەزەیەکی ئاسایشی قەرەداغ بەمەبەستی پاراستنی ئاسایش و ئارامی ناوچەکە و چاودێریکردنی ناوچەیەکی شوێنەواری لە ئەرکدابوون، چەند کەسێکی چەکدار بەمەبەستی دەرھێنان و بردنی شوێنەواری ( نەرامسین )لە ناوچە شوێنەوارییەکە بوون، ڕووبەڕووی مەفرەزەکەی ئاسایش بونەتەوە و بەداخەوە  بووە ھۆی شەھیدبوونی ( دوو )کارمەندی ئاسایش".

" لە ئێستادا ھەوڵەکان بەردەوامن بۆ دەستگیرکردنی تۆمەتباران و بەدواداچوون و لێکۆڵینەوە لە ڕووداوەکە"، لەڕاگەیەندراوەکەی ئاسایشدا هاتووە.

هاوکات لە رونکردنەوەیەکی تردا دەزگای ئاسایشی هەرێم رایگەیاندووە: "پاش گەیشتنی هێزەکانمان بە شوێنی ڕووداوەکەی ئەمڕۆی ناوچەی( قەرەداغ ) بەدواداچوون و لێکۆڵینەوەی ووردکرا بەهەماهەنگی سەرجەم هێزە ئەمنییەکان، بەڵگەو زانیاری سەرەتایی دەستکەوت لەسەر ڕووداوەکە و لە ئەنجامدا دەرکەوت کە کردەوەیەکی تیرۆریستییە و ئەنجامدەرانی سەربە ڕێکخراوی تیرۆریستی (داعش)ن".

PUKMEDIA