بڕیاردەری فراکسیۆنی یەکێتی: لەم هەفتەیەدا بەغدا مووچە دەنێرێت

PUKMEDIA

بڕیاردەری فراکسیۆنی یەکێتی

وردبینی لیستی مووچەی مانگی حەوتی مووچەخۆرانی هەرێم لەلایەن دیوانی چاودێرییەوە تەواوبووەو هیچ کێشەیەک لە لیستی مووچەدا نییە، بڕیاردەری فراکسیۆنی یەکێتیش لەئەنجومەنی نوێنەران ئاماژە بەوە دەکات: "بەهەموو ئەگەرێکەوە لەم هەفتەیەدا بەغدا مووچە بۆ هەرێم دەنێرێت".

کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "حکومەتی عیراق پێنجشەممەی رابردوو کۆتایی بە دابەشکردنی مووچەی مانگی حەوتی سەرجەم مووچەخۆرانی خۆی هێنا و بەهەموو ئەگەرێکەوە چاوەڕواندەکرێت لەم هەفتەیەدا مووچەی هەمان مانگی مووچەخۆرانی هەرێمیش بنێرێت".

"بەپێی ئەو زانیاریانەی لەوەزارەتی داراییەوە پێمگەیشتووە، دیوانی چاودێری وردبینی بۆ لیستی  مانگی حەوتی مووچەخۆرانی هەرێم تەواوکردوەو چاوەڕواندەکرێت وەزارەتی دارایی دەست بەناردنی مووچەی مووچەخۆرانی هەرێم بکات"، کاروان یاروەیس وادەڵێت.

عیراق دوای وەزارەتەکانی خۆی مووچەی هەرێم دەنێرێت

مانگانە حکومەتی عیراق لەدوای دابەشکردنی مووچەی سەرجەم وەزارەتەکانی دەست بەناردنی مووچەی مووچەخۆرانی هەرێمیش دەکات و لەئێستاشدا کۆتایی بەدابەشکردنی مووچەی خۆی هێناوە، چاوەڕواندەکرێت لەم هەفتەیەدا مووچە بۆ هەرێم بنێرێت.

بەپێی راگەیەندراوی وەزارەتی دارایی حکومەتی هەرێم لە رۆژی 21-7-2024 ەوە حکومەتی هەرێم لیستی مووچەی مانگی حەوتی مووچەخۆرانی هەرێمی بۆ بەغدا ناردووە، هاوکات لیستی مووچەی خانەنشینانیشی بەهاوتاکراوی لەگەڵ عیراق بۆ دارایی حکومەتی فیدراڵ ناردووە.

حکومەتی هەرێم زوتر لیستی مووچەی بۆ بەغدا ناردووە

بەراورد بە مانگەکانی رابردوو حکومەتی هەرێم زووتر لیستی مووچەی مانگی حەوتی مووچەخۆرانی ئامادەکرد و ئاڕاستەی بەغدای کرد، بەڵام دوای 15 رۆژ لەناردنی لیستی مووچە هێشتا دارایی عیراق مووچەی مانگی حەوتی مووچەخۆرانی هەرێمی نەناردووە، بڕیاردەری فراکسیۆنی یەکێتیش هۆکارەکەی بۆ ئەوە دەگەڕێنێتەوە کە حکومەتی عیراق هەتا مووچەی مووچەخۆرانی خۆی دابەشنەکات، مووچە بۆ هەرێم نانێرێت.

PUKMEDIA