بەهەوڵی یەکێتی مووچەی وارسی شەهیدانی شەڕی داعش دەخرێتەسەر بەغدا

PUKMEDIA

پێشمەرگە

بەهەوڵی فراکسیۆنی یەکێتی لە ئەنجومەنی نوێنەرانی عیراق مووچە و ئیمتیازاتی شەهیدانی دەستی تیرۆر دەخرێنەسەر بەغدا و ئەندامێکی فراکسیۆنەکەش دەڵێت: "لەو هەوڵەی یەکێتی هەزار و 285 وارسی شەهیدی شەڕی داعش سودمەنددەبن و ونبوانی شەڕی داعشیش دەگرێتەوە".

هەزار و 285 شەهیدی شەڕی داعش سودمەنددەبن

چرۆ حەمە شەریف ئەندامی لیژنەی شەهیدان و زیندانی سیاسی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "لەکۆبونەوەی دوێنێی ئەنجومەنی نوێنەرانی عیراقدا خوێندنەوەی یەکەم بۆ پڕۆژە یاسای دەزگای شەهیدان کراو بەهەوڵی فراکسیۆنی یەکێتی توانرا مووچە و ئیمتیازاتی شەهیدانی شەڕی داعش بخرێتە پرۆژەکەوە بۆ ئەوەی مووچە و ئیمتیازاتیان بخرێتە سەر بەغدا".

"لەم هەوڵەی فراکسیۆنی یەکێتی هەزار و 285 شەهیدی شەڕی داعش کەلە وەزارەتی پێشمەرگە بوون، سودمەند دەبن و هەوڵەکانی فراکسیۆنەکەش بۆ ئەوەیە ئەو بڕیارە زیندانیانی سیاسی هەرێمی کوردستانیش بگرێتەوە، بەڵام بەپێی بەدواداچونەکانمان تەنها ناوی زیندانیانی سیاسی یەکێتی لەبەغدا هەیە و هەندێک لایەن بەهۆکاری ئەوەی بندیواری زیندانیانی سیاسییان زۆرەو ناویان لەوەزارەتی شەهیدانی عیراق نییە کێشە بۆ پرۆسەکە دروست دەکەن"، چرۆ حەمە شەریف وای وت.

رێگرییەکان لەناوخۆی هەرێمەوە بەردەوامە

ئەندامەکەی لیژنەی شەهیدان و زیندانی سیاسی ئەوەش دەڵێت: "ئەمە جگە لەوەی نزیکەی 800 شەهیدی شەڕی داعش لەهەرێمی کوردستان هەیە، کەسەر بەهێزە ئەمنییەکانن و تا ئێستا دۆسیەکانیان یەکلا نەبووەتەوە، هاوکات حکومەتی عیراق رەزامەندی دەربڕیوە کە مووچەی زیندانیانی سیاسیش بخرێتە سەر بەغدا، بەڵام هێشتا رێگرییەکان لەناوخۆی هەرێمەوە بۆ پەکخستنی ئەو پرۆسەیە بەردەوامە".

ونبوانی شەڕی داعشیش دەگرێتەوە

حکومەتی عیراق داوایەکی فراکسیۆنی یەکێتی جێبەجێ دەکات و بەو پێیەش مووچەی وارسی شەهیدان و ونبوانی شەڕی داعش و هاوتای بەغدا دەکرێت.

سروە محەمەد ئەندامی فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "پڕۆژە یاسای دەزگای شەهیدان چەندجارێکی دیکە خراوەتە دانیشتنەکانی ئەنجومەنی نوێنەرانەوە، بەڵام بەمەبەستی گۆڕانکاری نێردراوەتە بۆ حکومەت، کە ونبوانی شەڕی داعشیش دەگرێتەوە".

"حکومەتی عیراق دوای گۆرانکاری لە پرۆژەیاساکەدا و جێبەجێکردنی داواکەی فراکسیۆنی یەکێتی بۆ تەواوکردنی رێکارەکانی مووچەی شەهیدانی شەڕی داعش بۆ سەر بەغدا، جارێکیدیکە پرۆژەکەی ناردەوە پەرلەمان و توانرا خوێندنەوەی یەکەمی بۆ بکرێت"، سروە محەمەد وایووت.

یەکێتی خاوەنی 26 هەزار شەهیدە

یەکێتیی نیشتمانیی کوردستان کە بە حزبی شەهیدان ناسێنراوە، لەسەرەتای دامەزراندنیەوە هەتا ئێستا خاوەنی 26 هەزار شەهیدە، کەلەو ژمارەیە زیاتر لە هەزار شەهیدی لەبەرەنگاربونەوەی تیرۆرستان شەهیدبوون، کەبەشێکی زۆریان سەرکردە و فەرماندەکانی هێزی پێشمەرگەی بوون و لەناوچەکانی دەرەوەی هەرێمی کوردستان شەهیدبوون.

PUKMEDIA