پەرلەمانی عیراق کۆبوونەوەکانی دەستپێدەکاتەوە

PUKMEDIA

هۆڵی کۆبوونەوەکانی ئەنجومەنی نوێنەرانی عیراق

وەرزی نوێی یاسادانان لە ئەنجومەنی نوێنەرانی عیراق دەستپێدەکاتەوە و چاوەڕوان دەکرێت لەم وەرزەدا پەرلەمان سەرۆکێکی نوێ هەڵبژێرێت، بڕیاردەری فراکسیۆنی یەکێتیش لە ئەنجومەنی نوێنەرانی عیراق دەڵێت: "چەند پڕۆژە یاسایەکی گرنگ بۆ کورد هەیە کە پێویستە لەم وەرزەدا دەنگی لەسەربدرێت".

خوێندنەوەی یەکەم و دووەم بۆ چەند پڕۆژەیاسایەک دەکرێت

ئەنجومەنی نوێنەرانی عیراق رۆژی شەممەی هەفتەی داهاتوو 20ـی 7ـی 2024، دانیشتنەکانی وەرزێکی نوێی یاسادانان دەستپێدەکاتەوە و داوا لە ئەندامانی ئەنجومەن دەکات لە پەرلەمان ئامادەبن بۆ دەستپێکردنەوەی کۆبوونەوەکانی ئەنجومەنی نوێنەرانی عیراق.

بەپێی کارنامەکە کۆبوونەوەکەی ئەنجومەنی نوێنەران پێکدێت لە ؛خوێندنەوەی یەکەم بۆ پڕۆژە یاساکانی دەزگای شەهیدان و خزمەتگوزاری ئاسمانی نێوان عیراق و ئازەربایجان، هاوکات لە کۆبوونەوەکەدا خوێندنەوەی دووەم بۆ پڕۆژەیاساکانی دەزگای هەواڵگری نیشتمانی و پاسپۆرت دەکرێت.

پێویستە سەرۆکێکی نوێ هەڵبژێردرێت

لە وەرزی نوێی یاساداناندا پێویستە ئەنجومەنی نوێنەرانی عیراق سەرۆکێکی نوێ هەڵبژێرێت، بۆ ئەو مەبەستەش لایەنە سوننەکان ئاگادار کراونەتەوە.

لەوبارەیەشەوە کاروان یاروەیس بڕیاردەری فراکسیۆنی یەکێتی لە ئەنجومەنی نوێنەرانی عیراق بە PUKMEDIA ی راگەیاند: "پێویستە لەم وەرزەدا پەرلەمان سەرۆکێکی نوێ بۆخۆی هەڵبژێرێت و لەو چوارچێوەیەشدا تا رۆژی 20ـی 7ـی 2024 مۆڵەت دراوە بە لایەنە سوننەکان کە کەسێک وەک سەرۆکی نوێی پەرلەمان دیاریبکەن".

"چەند پڕۆژە یاسایەکی گرنگ بۆ کورد هەیە کە پێویستە لە کۆبوونەوەکانی داهاتوودا دەنگی لەسەربدرێت وەک؛ تەواوکردنی بەپارێزگابوونی هەڵەبجە و هەڵوەشانەوەی بڕیارەکانی دادگای سەورە و دەنگدان لەسەر یاسای هەواڵگری عیراق و چەند پڕۆژەیاسایەکی دیکەی گرنگ"، کاروان یاروەیس وادەڵێت.

دواخستنی پشووی پەرلەمان سەرۆکێکی نوێی دیارینەکرد

لەگەڵ ئەوەی بڕیاربوو رۆژی 9ـی 5ـی 2024 پەرلەمان پشووی یاسادانانی خۆی وەربگرێت، بەڵام بەهۆی بڕیاری دادگای فیدراڵییەوە کە خۆی لە پەسەندکردنی بودجەی ساڵی 2024 و هەڵبژاردنی سەرۆکێکی نوێ بۆ پەرلەمان، پشووەکە بۆ ماوەی مانگێک دواخرا و لەو وادەیەدا پەرلەمان توانی یاسای بودجە پەسەند بکات، بەڵام پرسی هەڵبژاردنی سەرۆکێکی نوێ بۆ پەرلەمان وەک خۆی مایەوە و لایەنە سوننەکان نەگەشتنە رێککەوتنێک بۆ دەستنیشانکردنی کەسێک وەک سەرۆکی نوێی پەرلەمان.

ئەنجومەنی نوێنەرانی عیراق لە 9ـی 6ـی 2024ـەوە پشووی یاسادانانی وەرگرتووە و بڕیارە رۆژی 20ـی 7ـی 2024، یەکەم کۆبوونەوەی خۆی دوای پشووەکە دەستپێبکاتەوە.
PUKMEDIA