ئاسایش تۆڵەی شەهید جوامێر دەکاتەوە

PUKMEDIA

لۆگۆی ئاسایش

دەزگای ئاسایشی هەرێم، تۆڵەی شەهید جوامێر دەکاتەوە و موڵگەکانی داعش لە سنووری قەزای داقوق خاپوور دەکات.

دەزگای ئاسایشی هەرێم لە راگەیەندراوێکدا کە کۆپییەکی بۆ PUKMEDIA نێردراوە رایگەیاند: "لەسەر بنەمای زانیاری ووردی هەواڵگری پاڵپشت بە لێکۆڵێنەوەکان لەگەڵ تیرۆرستی دەستگیرکراو، هێزەکانی دەزگای ئاسایشی هەرێم بەهەماهەنگی هێزە ئەمنییەکانی عیراق، پاش دیاریکردنی حەشارگە و مۆڵگەکانی داعش لەسنوری (چیای زەمبور)ـی قەزای داقوق لەڕۆژی ٢٠٢٤/٧/١٤ بۆردومانکران و لەئەنجامدا سەرجەم تیرۆرستان لەناوبران و مۆڵگەکانیان بەتەواوی خاپوورکران".

"ئەم چالاکییە لەلایەن بەڕێوەبەرایەتی گشتی ئۆپراسیۆنەکانی ئاسایش و دەزگای ئاسایشی نیشتیمانی عیراق و فڕۆکە جەنگییەکانی عیراق بەفڕۆکەی (F-16) ئەنجامدرا، لەهەمان ڕۆژدا لەتۆڵەی شەهید جوامێر عەزیز کرایەوە"، راگەیەندراوەکەی ئاسایش وادەڵێت.

ئەوەش هاتووە: "دوای ئەوەی لەناحیەی قەرەهەنجیر (دوو ) چەکداری داعش ڕووبەڕوی هێزەکانمان بوونەوە و تیرۆرستێک کوژراو و چەکدارێکی داعش بە برینداری دەستگیرکرا، دەستبەجێ لەئەنجامی تۆڵەی شەهید جوامێر و سەرجەم شەهیدانی پاراستنی خاکی کوردستان ئەم ئۆپراسیۆنە گرنگە ئەنجامدرا، هێزەکانی دەزگای ئاسایشی هەرێم دڵنیایی دەداتە هاووڵاتیان لەهەوڵەکانی بەردەوامە بۆ ئاسایش و ئارامی کوردستان".

PUKMEDIA