داوای لێکۆڵینەوە لەروخاندنی ماڵی سەیدئەحمەدی خانەقا دەکرێت

PUKMEDIA

وێنەیەک لەماڵی سەید ئەحمەدی خانەقا

نوسینگەی ئاسۆ مامەند سەبارەت بە رووخاندنی ماڵی سەید ئەحمەدی خانەقا پەیامێک بڵاودەکاتەوەو رایدەگەیەنێت: " داوای لێکۆڵینەوەی بەپەلە لە هۆکاری رووخاندنی (ماڵی سەید ئەحمەدی خانەقا) دەکەین، و هەرچی زووە بکەرانی ئەو کارە نابەجێیە رووبەڕووی لێپیرسینەوە بکرێنەوە".

نوسینگەی هەڤاڵ ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان لە راگەیەندراوێکدا کە کۆپییەکی بۆ PUKMEDIA نێردراوە رایدەگەیەنێت: "دوای ئەوەی کە ئاگادار کراینەوە؛ (ماڵی سەید ئەحمەدی خانەقا) رووخێندراوە، زۆر نیگەران بوین بەو هەواڵە، چونکە ئەو خانەقایە بەشێکی گرینگە لە مێژووی سێ سەدەی رابردووی کەرکوک بە هەموو رووداوە خۆش و ناخۆشییەکانییەوە، پێشووتریش ئەو خانەقایە لەسەر ئەرکی رەوانشاد سەرۆک مام جەلال نۆژەن کراوەتەوە و گرینگی پێدراوە".

"بۆیە لەم سۆنگەیەوە داوای لێکۆڵینەوەی بەپەلە لە هۆکاری رووخاندنی (ماڵی سەید ئەحمەدی خانەقا) دەکەین، و هەرچی زووە بکەرانی ئەو کارە نابەجێیە رووبەڕووی لێپیرسینەوە بکرێنەوە، هەرەوک ئەوانەشی کە ئاگاداری ئەو بابەتە بون و تیایدا کەمتەرخەم بون، لێپرسینەوەیان لەگەڵدا بکرێت"، راگەیەندراوەکە وا دەڵێت.

PUKMEDIA