تا بایەقوش لەسەر ماڵی کەرکوک نەخوێنێ

PUKMEDIA

ستران عەبدوڵڵا

ستران عەبدوڵڵا

وێنەی بایەقوش وایە، لە هەرکوێ بێت، خەرابە و خەرابات و خراپی لە جێی خۆی جێدێڵێت، وەک کونەپەپو جەڤەنگە بۆ کەوتن و خستن و خەساندن، نیشانەیە بۆ کوێرکردنی چاوی ژیان و کوژانەوەی کانیاوی ئاوەدان.

ئەم بەڵایە وەک تەعریب وایە بچێتە هەر شوێنێک جیاوازی و جیاکاری و ماڵوێرانی و ماڵجیایی لەگەڵ خۆی دێنێت، ماڵی ئارامی و مەکۆی دڵنیایی بە ماڵی گرژی و نا ئارامی دەگۆڕێتەوە. وا دەکات وەیسە لە کولبەی ئاوارەیی و خانووی بەجێماویش ناحەوێتەوە و ناخەوێتەوە، 
 جەللادێکە زمان دەبڕێ و زمان دەسەپێنێ و زمانی لێ دەدا و زمان ئالودەی بوختان و ئاوێتەی ڕق و جیاوازی رەگەزی و دەردی  رەگەزبازی دەکات.

 
ئەم ژەهرە نادادی و بێ یاسایی و بێ نامووسی برەو پێدەدا،وەک تەرحیل وایە، دڵ لەجێ هەڵدەکەنێ و دڵ لە شوێن دەتۆرێنێ و دڵەڕاوکێی زەمان و مەکان دەکاتە ناونیشانی جێگیر لە نیشتەنی شپرزە و شەپڕێودا . رەسەن و بنەما  تەوەلا دەکا و نازی شار و نازی دراوسێیەتی دەپوکێنێتەوە. تەرحیل پەڕوباڵ دەکاتەوە و جریوە مت دەکا و زیندەگی مات و مەلول.

ئەم زام و ژانی ناکاو وایە، وەک تەبعیس وایە، بە بندەست و ژێردەست و زوڵـملێکراو دەوێرێ و لەولا تریش ملکەچ و ملقەوی و ملشۆڕی ئەجنەبی و رۆم و عەجەم دەبێت تا  بەس لێی بێدەنگ بن و لێی نەیەنە دەنگ. چون سەددام کە خۆی لە میللەتی گەمارۆداو کردبوو بە قەیسەر و کە بۆی هاتن کونە مشکی لێ بووە قەیسەری.

 وەک تەسفیر وایە مەیلی داگیرکاری و دارکاری و لێسەندنەوەی ناسنامە و تەفرەقەی مەزهەبی هەیە و حەزی بە داد و یەکسانی و یەک چانسی و یەک چارەنووسی نییە، شەرمەزاری لای میللەتی خۆیەتی و سەرشۆڕی لای بێگانە و ئەغیارە.

وەک ستەمکاری وایە کەیفی بە سەروەری و دادپەروەری نایە و لەسەر داروپەردوی  ناعەدالەتی و نا یاکسانی و تەفرەقەی گرەوسازی و کەینوبەینی هەرێمایەتی تەلاری تاریک ئاوا دەکات.

وەک کەرکوکی زوڵملێکراو و بندەست وایە، شەش مانگە پێکوتەیەتی و پێشێلی قاعیدە و دابودەستور دەکات و هیچ دەرچەیەکی پێ نییە، بۆیە خەراباتێکە نە بڕێتەوە ، وێنەی ماڵی روخاوی ژوور داتەپاوی تەپە و رەحیماوا و شۆرجە وایە . وێنەی ئەزموونی پەکخراوی دیموکراسی لۆکاڵی کەرکوکە  کە خەریکە دەنگەکان ژەنگ هەڵدێنن، تاکانی تەعریب و تەرحیل و تەبعیس و تەسفیر خەریکن لەگەڵ تەهریب و تەخریب و تەرهیب  کلک گرێدەدەن و کەڵکی هیچ بەم وڵاتەوە ناهێڵن.

لە هەر کوێ دادو یاسا سەروەری و دادپەروەری وەک کەرکوک تەنگی پێهەڵچنرا ، هەر ئەو شوێنە دەتوانێ نیشتەنی بەرەنگاری و پێتەختی بزاوتی  تێهەڵچوونەوە بێت. 

هەموو جار مام جەلال دەیگوت : گوتە هەر گوتە و دروشم نییە، دەڕبڕینی سیاسەت و ستراتیجیشە.

بۆیە تا گەرگرینی کەرکوک هەموو وڵاتی عێراق و هەموو نیشتمانیی کوردستانی نەگرتۆتەوە گەرەکە هیمەتی داد و یەکسانی بۆ بکەین.

PUKMEDIA