سه‌رۆككۆمار: هاریكاری ته‌واو له‌نێوان حكومه‌ته‌كانی فیدراڵ و هه‌رێمدا هه‌یه‌

PUKMEDIA

سەرۆککۆمار لە چاوپێکەوتنی RT

سەرۆککۆماری عیراق لە چاوپێکەوتنێکی رۆژنامەوانیدا وێڕای باسکردن لە چەندین پرسی گرنگی تایبەت بە عیراق و ناوچەکە و جیهان، هاوکات باس لە پەیوەندییەکانی نێوان هەرێم و عیراق دەکات و دەڵێت: "هه‌نگاوه‌كان به‌ئاڕاسته‌ی چاره‌سه‌ری كێشه‌كان ده‌ڕۆن و هاریكاری ته‌واو هه‌یه‌ له‌نێوان حكومه‌تی فیدراڵی و حكومه‌تی هه‌رێمی كوردستاندا".

د. لەتیف: عیراق گۆڕ‌انكارییه‌كی به‌رچاوی به‌خۆوه‌بینیوه‌

د.له‌تیف جه‌مال ره‌شید سه‌رۆك كۆماری عیراق له‌چاوپێكه‌وتنێكی ته‌له‌فزیۆنیدا له‌گه‌ڵ كه‌ناڵی RT رایگه‌یاند:"عیراق بۆ ماوه‌ی زیاتر له‌چوار ده‌یه‌ به‌ده‌ست بارودۆخێكی سه‌خته‌وه‌ ده‌یناڵاند، كه‌ بریتیبوو له‌ جه‌نگ و داگیركردن و توندوتیژی و تیرۆر، له‌ دوای كۆتاییهاتنی قۆناغی سه‌ختی توندوتیژی و تیرۆریش، عیراق گۆڕ‌انكارییه‌كی به‌رچاوی به‌خۆوه‌بینیوه‌، به‌تایبه‌ت له‌ئێستادا كه‌ ئاسایش به‌رقه‌راره‌ و خه‌ڵك به‌بێ ترس و دڵه‌ڕ‌اوكێ ده‌چنه‌ سه‌ر شه‌قامه‌كان و ئاشتی و ئاسایش له‌ عێراقدا جێگیره‌".

"ده‌مانه‌وێت ئاشتی و سه‌قامگیری له‌عیراقدا بچه‌سپێنین و پته‌وی بكه‌ین، هه‌روه‌وها په‌یوه‌ندییه‌كانمان له‌گه‌ڵ وڵاتانی دراوسێ و كۆمه‌ڵگه‌ی نێوده‌وڵه‌تیدا باشتر بكه‌ین، له‌گه‌ڵ ئه‌وه‌شدا وڵاتان هه‌موویان تێگه‌یشتون له‌وه‌ی بارودۆخی عیراق به‌شێوه‌یه‌كی به‌رچاو گۆڕ‌اوه‌و هه‌نگاوی باشی ناوه‌" سه‌رۆك كۆماری عیراق واده‌ڵێت.

هەرێم و عیراق - هه‌نگاوه‌كان به‌ئاڕاسته‌ی چاره‌سه‌ری كێشه‌كان ده‌ڕۆن

د.له‌تیف جه‌مال ره‌شید له‌باره‌ی په‌یوه‌ندییه‌كانی هه‌رێمی كوردستان و عیراق ده‌ڵێت:" هاریكاری ته‌واو هه‌یه‌ له‌نێوان حكومه‌تی فیدراڵی و حكومه‌تی هه‌رێمی كوردستانداو هه‌نگاوه‌كان به‌ئاڕاسته‌ی چاره‌سه‌ری كێشه‌كان ده‌ڕۆن و هیوامان به‌ چاره‌سه‌ری ته‌واوی كێشه‌كان هه‌یه‌".

سەرۆککۆمار: ده‌ستمانكردوه‌ به‌ باشتركردنی ژێرخانی وڵاتمان

فره‌یی سیاسی و نه‌ته‌وه‌یی و پێكهاته‌یی له‌عیراق ته‌وه‌رێكی دیكه‌ی دیداره‌كه‌ی سه‌رۆككۆمار بوو له‌و باره‌یه‌شه‌وه‌ وتی:" دیالۆگ له‌نێوان  پێكهاته‌كانی عیراق بۆ به‌رژه‌وه‌ندی ئاینده‌ی عیراق له‌ئارادایه‌، هاوكات هه‌ڵبژاردن به‌شێوه‌ی خول بۆ پێكهێنانی حكومه‌تی فیدراڵی و حكومه‌ته‌ خۆجێیه‌كان له‌ چوارچێوه‌ی پرۆسه‌ی دیموكراسیدا، ئه‌نجامده‌درێت، له‌لایه‌كی دیكه‌شه‌وه‌ ده‌ستمانكردوه‌ به‌ باشتركردنی ژێرخانی وڵاتمان، چونكه‌ بۆ ماوه‌یه‌كی دورودرێژ دووچاری پشتگوێخستن و زیان بووبوو، هه‌روه‌ها كارده‌كه‌ین بۆ باشتركردنی خزمه‌تگوزاری له‌بواره‌كانی ته‌ندروستی، فێركردن و گواستنه‌وه‌ و هه‌وڵده‌ده‌ین له‌گه‌ڵ وڵاتانی جۆراوجۆردا كاربكه‌ین بۆ به‌ره‌وپێشبردنی ئه‌و سێكته‌رانه‌ و په‌ره‌پێدانی وڵات".

عیراق ده‌توانێت ئاسایشی خۆی له‌ئه‌ستۆبگرێت

له‌باره‌ی په‌یوه‌ندییه‌كانی عیراق له‌گه‌ڵ وڵاتانی دراوسێ و وڵاتانی دیكه‌ سه‌رۆك كۆماری عیراق رایگه‌یاند:" ئێران دراوسێیه‌كی زۆر گرنگی عیراق و په‌یوه‌ندییه‌كانمان له‌گه‌ڵیدا باش و به‌هێزن و له‌بواره‌ جۆراوجۆره‌كاندا به‌رده‌وام به‌ره‌وپێش ده‌چن، هه‌روه‌ها په‌یوه‌ندیمان له‌گه‌ڵ ویلایه‌ته‌ یه‌كگرتووه‌كانی ئه‌مریكاش باشه‌ و رێزی لێده‌گرین، بوونی هاوپه‌یمانێتی نێوده‌وڵه‌تی به‌گوێره‌ی رێككه‌وتنێكی هاوبه‌ش بووه‌، له‌گه‌ڵ ئه‌وه‌شدا رێككه‌وتنه‌كان به‌پێی بارودۆخه‌كان ماوه‌ ماوه‌ پێداچونه‌وه‌یان پێدا ده‌كرێت، له‌ئێستادا عیراق ده‌توانێت ئاسایشی خۆی له‌ئه‌ستۆبگرێت".

ئاماژه‌ی بۆ ئه‌وه‌شكرد:" به‌شداریكردنی ویلایه‌ته‌ یه‌كگرتووه‌كان و هاوپه‌یمانێتی نێوده‌وڵه‌تی له‌ شه‌ڕ‌ی دژ به‌ تیرۆر، لە مه‌شق و راهێناندا به‌رزده‌نرخێنین. بوونیان له‌ وڵات یاخود رۆیشتنیان به‌نده‌ به‌گه‌یشتن به‌ڕ‌ێككه‌وتنێك له‌ كاتی گونجاودا ئه‌ویش له‌ڕ‌ێگه‌ی راوێژكردن له‌گه‌ڵ هێزه‌ سیاسییه‌كان و ئه‌نجومه‌نی نوێنه‌ران و دامه‌زراوه‌ حكومییه‌كان بۆ هه‌ڵسه‌نگاندنی ئه‌وه‌ی چی پێویسته‌ هاوپه‌یمانێتی نێوده‌وڵه‌تی بیكات، هه‌روه‌ها په‌یوه‌ندییه‌كانمان له‌گه‌ڵ روسیا هه‌میشه‌ په‌یوه‌ندییه‌كی باش بووه‌، پێشتر له‌گه‌ڵ یه‌كێتی سۆڤیه‌ت و ئێستا له‌گه‌ڵ روسیادا، ده‌مانه‌وێت ئه‌م په‌یوه‌ندییه‌ به‌هێز بكه‌ین و سوود له‌ ئه‌زمونه‌كانی  نۆژه‌نكردنه‌وه‌ی ژێرخان و كه‌رتی وزه‌ و ئاو و ئاودێری و چه‌ندین لایه‌نی ژیان و هه‌روه‌ها لایه‌نی كولتوری ببینین، به‌وپێیه‌ی روسیا خاوه‌نی میراتێكی ده‌وڵه‌مه‌ندی كولتورییه‌."

كۆمه‌ڵكوژی فه‌ڵه‌ستینییه‌كان سه‌ركۆنه‌ ده‌كه‌ین

له‌باره‌ی هه‌ڵوێستی عیراقیش له‌سه‌ر گرژییه‌كانی نێوان فه‌له‌ستین و ئیسرائیل سه‌رۆك كۆماری عیراق ئه‌وه‌ی خسته‌ڕوو:"جه‌ختده‌كه‌ینه‌وه‌ كه‌ پێویسته‌ ته‌واوی مافی دیاریكردنی چاره‌نوس و داننان به‌ ده‌وڵه‌تی فه‌ڵه‌ستین بدرێت به‌ گه‌لی فه‌ڵه‌ستین. به‌توندی كۆمه‌ڵكوژی فه‌ڵه‌ستینییه‌كان سه‌ركۆنه‌ ده‌كه‌ین، هه‌روه‌ها داوا ده‌كه‌ین ده‌ستبه‌جێ جه‌نگ رابگیرێت و هاوكاری بۆ گه‌لی فه‌ڵه‌ستین دابینبكرێت، هه‌روه‌ها ئه‌ركی كۆمه‌ڵگه‌ی نێوده‌وڵه‌تییه‌ فشاری زیاتر بكات بۆ داننان به‌مافی چاره‌نوسی فه‌ڵه‌ستینییه‌كان، پێویستیشه‌ ئه‌و جینۆسایده‌ رابگیرێت، كه‌ هه‌موو رۆژێك له‌دژی گه‌لی فه‌ڵه‌ستین ئه‌نجامده‌درێت."

PUKMEDIA