جێگری سەرۆکی هەرێم: هێشتا بیری توندڕەویی مەترسییە

نوسینگەی رۆژنامەوانی جێگری سەرۆکی هەرێم

شێخ جەعفەر شێخ مستەفا و جەنەڕاڵ مایک ئیکەر

 رۆژی  ٢٠٢٤/٦/٥  شێخ جەعفەر شێخ مستەفا جێگری سەرۆکی هەرێمی کوردستان، پێشوازی لە جەنەڕاڵ مایک ئیکەر لێپرسراوی گروپی ڕاوێژکاری سەربازیی هاوپەیمانی نێودەڵەتیی دژ بە داعش و کۆڵۆنێڵ ماکنزی و وەفدێکی یاوەری کرد، کە بە مەبەستی ماڵئاوایی و تەواوبوونی ئەرکەکەیان سەردانی  جێگری سەرۆکی هه‌رێمی-یان کرد.

لەراگەیەنراوێکی نوسینگەی جێگری سەرۆکی هەرێمی کوردستاندا کە وێنەیەکی بۆ PUKMEDIA نێردراوە، هاتووە:"لە دیدارێکدا جێگری سەرۆکی هەرێم، سوپاس و ستایشی هێزەکانی ئەمه‌ریکای لە چوارچێوەی هاوپەیمانیی نێودەوڵەتیی دژ بە داعش لە ناوچەکەدا کرد،  جەختی لە گرنگی و هەبوونی هێزەکانی هاوپەیمانان کردەوەو پێیوایە تیرۆر و بیری توندڕەوی هێشتا مەترسیە بۆ سەر ناوچەکە، هەروەها پەیوەندی بەهێزی نێوان لایەنە سیاسییەکانی عێراق و هەرێمی کوردستانی بە کلیلی چارەسەری کێشەکان زانی، هیوای خواست لەپێناوبەرژەوەندییەکانی گەل و نیشتیمان، لە چوارچێوەی یاسا و دەستوردا کێشەکان  کۆتای بێت".

وەفدەکەش سوپاسی هاوكاریی و هەماهەنگیی لایەنە پەیوەندیدارەكانی هەرێمی كوردستانی كرد و جەختیان لە بەردەوامی و برەودانی پەیوەندییەکانی نێوان وڵاتەکەیان لەگەڵ عێراق و هەرێمی کوردستان کردەوە، هەروەها بە گرنگییەوە لە پرۆسەی چاکسازیی و یەکخستنەوەی هێزی پێشمەرگەیان ڕوانی، لەپێناو ئارامیی و سەقامگیری زیاتر بۆ ناوچەکە.

هەروەک جێگری سەرۆک سوپاس و پێزانینی پێشکەش بە جەنەڕاڵ مایک ئیکەر کرد و هیوای سەرکەوتنی لە ئەرکی داهاتوودا بۆ خواست.

PUKMEDIA