ئەنجومەنی نوێنەران بۆ پرسی بودجە کۆدەبێتەوە

PUKMEDIA

ئەنجومەنی نوێنەرانی عیراق

ئەنجومەنی نوێنەرانی عیراق بۆ دەنگدان لەسەر هەمواری خشتەی بودجەی 2024 کۆدەبیتەوە، ئەندامێکی ئەنجومەنەکەش دەڵێت: "هەوڵەکانی سەرۆکوەزیران بۆ دەنگدان لەسەر هەمواری بودجە بەردەوامی هەیە، چونکە ناکرێت لەوە زیاتر پەسەندکردنەکە دوابکەوێت و کاروبارەکانی حکومەت رابگیرێت".

سەرۆکایەتی ئەنجومەنی نوێنەرانی عیراق لە راگەیەندراوێکدا کە کۆپییەکی بۆ PUKMEDIA نێردراوە، داوا لە ئەندامەکانی دەکات رۆژی دووشەممە 3-6-2024 ئامادەبن لە هۆڵی کۆبونەوە بەمەبەستی دەنگدان لەسەر هەمواری خشتەی بودجەی ساڵی 2024ی عیراق.

ناکرێت کاروبارەکانی حکومەت رابگیرێت

د. بڕیار رەشید ئەندامی ئەنجومەنی نوێنەرانی عیراق لە فراکسیۆنی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند :"محەمەد شیاع سودانی سەرۆکوەزیرانی عیراق و چوارچێوەی هەماهەنگی هەوڵەکانیان چڕکردوەتەوە بۆ پەسەندکردن و دەنگدان لەسەر هەمواری خشتەی بودجە و دەیانەوێت پێش دەستپێکردنی پشووی وەرزی یەکەمی یاسادانان، بودجە پەسەندبکرێت، چونکە ناکرێت لەوە زیاتر کاروبارەکانی حکومەت رابگیرێت".

"پێویستە لە کۆبونەوەکەی سبەینێی ئەنجومەنی نوێنەراندا 165 پەرلەمانتار ئامادەبن، بۆ ئەوەی ژمارەی یاسایی پەرلەمانتارانی ئامادەبوو تەواو بێت، بەڵام لە ئێستادا ژمارەیەک پەرلەمانتار گەشتی حەجیان کردوەو هاوکات ژمارەیەک لە پەرلەمانتارانی سونەش بایکۆتی دانیشتنەکانیان کردووە، بۆیە دیار نییە کە دانیشتنەکە ئەنجامدەدرێت یاخود نا"، د. بڕیار رەشید وای وت.

بەپێی راگەیەندراوەکەی سەرۆکایەتی ئەنجومەنی نوێنەران کۆبونەوەکە سەعات 3ی پاشنیوەڕۆی رۆژی دووشەممە دەبێت، ئەمەش پشتبەستن بە یاسای هەموارکراوی بودجە لەلایەن لیژنەی داراییەوە.

لەگەڵ ئەوەی بڕیاربوو رۆژی 9-5-2024  پشووی وەرزی یەکەمی یاسادانان لەئەنجومەنی نوێنەرانی عیراق دەستپێبکات، بەڵام بەهۆی دەستنیشانکردنی سەرۆکێکی نوێ بۆ ئەنجومەنەکە و پەسندکردنی خشتەی بودجەی ساڵی ٢٠٢٤ی عیراق، بۆ ماوەی مانگێک پشووەکە دواخرا و هەوڵەکان بەردەوامە بۆ ئەوەی پرسی بودجە دەنگی لەسەر بدرێت.

PUKMEDIA