پلانی چارەسەر بۆ پیسبوونی ژینگە و ئاو لە سلێمانی دادەنرێت

نوسینگەی رۆژنامەوانی قوباد تاڵەبانی

سەردانی قوباد تاڵەبانی بۆ تانجەرۆ

قوباد تاڵەبانی جێگری سەرۆک وەزیران بە یاوەری نزار محەمەد سەعید ئامێدی وەزیری ژینگەی عێراق و وەفدێکی رێکخراوی خۆراکی جیهانی (WFP) بۆ چارەسەرکردنی کێشەی خۆڵ و خاشاکی سلێمانی و پاککردنەوەی ئاوی تانجەرۆ، سەردانی ناوچەی تانجەۆیان کرد.

دوای سەردانە مەیدانییەکە کە رۆژی شەمە ( ١ی حوزەیرانی ٢٠٢٤) بە ئامادەبوونی بەڕێوەبەرایەتی و لایەنە پەیوەندیدارەکانی پارێزگای سلێمانی ئەنجامدرا، لە کۆبوونەوەیەکدا باسی مەترسییەکانی کەڵەکەبوونی خۆڵ و خاشاک و پیسبوونی ئاوی تانجەرۆ و دەربەندیخان بۆ سەر ژینگە و تەندروستی هاوڵاتییان کرا و گفتوگۆش کرا لەسەر چۆنییەتی چارەسەرکردنی کێشەکە.

جێگری سەرۆک وەزیران لە کۆبوونەوەکەدا داوایکرد لایەنە پەیوەندیدارەکانی حکومەتی هەرێم لەگەڵ وەزارەتی ژینگەی عێراق و رێکخراوی WFP پلانێکی زانستی بۆ چارەسەرکردنی خێرا و دوورمەودا ئامادە بکەن و ئامادەیی حکومەتی هەرێمیشی دەربڕی بۆ کاری هاوبەش لەپێناو چارەسەرکردنی کێشەکە.

هەر لە کۆبوونەوەکەدا نزار محەمەد سەعید ئامێدی وەزیری ژینگەی عێراق، ئامادەیی وەزارەتەکەی دەربڕی بۆ کاری پێکەوەیی لەگەڵ حکومەتی هەرێم و رێکخراوی WFP و سەرپەرشتی کردنی چارەسەرکردنی کێشەکە.

لە کۆتایی کۆبوونەوەکەدا بڕیاری پێکهێنانی لیژنەیەکی هاوبەش لە لایەنە پەیوەندیدارەکانی پارێزگای سلێمانی و وەزارەتی ژینگەی عێراق و رێکخراوی WFP و رێکخراوە نێودەوڵەتییەکانی دیکە درا بۆ ئامادەکردنی پلان و دواتریش جێبەجێکردنی پلانەکە.

PUKMEDIA