سەعدی پیرە: یەکێتی باشترکردنی ژیانی خەڵکی دەوێت

نوسینگەی رۆژنامەوانی سەعدی ئەحمەد پیرە

سەعدی ئەحمەد پیرە و ئاراکاوا میکیهیرۆ

وتەبێژی یەکێتیی نیشتمانیی کوردستان رۆڵی ژاپۆن لەهەرێم و ناوچەکە بەرزدەنرخێنێت و رایدەگەیەنێت:" ژاپۆن ساڵانێکی زۆرە لەهەرێمی کوردستان خزمەت دەکات و چاوەڕوانی زیاتریشیان لێدەکەین، چونکە یەکێتی باشترکردنی ژیانی خەڵکی  دەوێت".

سەعدی ئەحمەد پیرە ئەندامی مەکتەبی سیاسی و وتەبێژی یەکێتیی نیشتمانیی کوردستان رایگەیاند:"یەکێتی خوازیاری سەقامگیری سیاسی و باشترکردنی ژیان و گوزەرانی کۆمەڵانی خەڵکی کوردستانە، هاوکات لەگەڵ گۆڕانی سیاسی و حکومڕانی دایە لە رێگەی هەڵبژاردنێکی دیموکراسییانە لە کاتی خۆیدا ، پێویستیشە هەموو لایەک سەنتەری کار و بیرکردنەوەمان پاراستنی ئەزموونی هەرێمی کوردستان و بەدەستهێنانی مافە یاسایی و دەستورییەکانی خەڵکی کوردستان بێت و سەقامگیری ئاسایشی هەرێم و سەروەری یاسا بپارێزرێت ".

لەبارەی کێشەکانی هەرێمی کوردستان لەڕوی ئاسایشەوە سەعدی ئەحمەد پیرە رایگەیاند:" مەترسی شانە نوستووەکانی تیرۆرستان و کێشەی نێوان جوتیارانی کورد و عەرەب  لە ناوچە کوردستانییەکان و هەموو ئەو کێشانەی لەناوچەکە هەن پێویستی بە چاودێری وورد و هەستیار هەیە، تاوەکو ئاڵۆزی سیاسی و کۆمەڵایەتی لێنەکەوێتەوە کە ببێتە مایەی تێکچوونی ئاسایشی ناوچەکە و لەم قۆناغەشدا عیراق و هەرێمی كوردستان پێویستیان بە مانەوە و ئامادەیی زیاتری نێردەی نەتەوەیەكگرتووەكان و ئاژانسە جیاوازەكانی سەربە نەتەوەیەكگرتووەكانە، بۆ زیاتر هاوكاریكردنی دەزگا و دامەزراوە سیاسی و حكومی و ئیداریەكان".

ئەم وتانەی سەعدی ئەحمەد پیرە لەمیانەی کۆبوونەوەی لەگەڵ ئاراکاوا میکیهیرۆ کونسڵی گشتی ژاپۆن لە هەرێمی کوردستان هات و ستایشی کار و بەرنامە خزمەتگوزارییەکانی کونسڵخانەی گشتی ژاپۆن و ئاژانسی جایکای کرد کە ساڵانێکی زۆرە لەهەرێمی کوردستان لە بوارە جیاوازەکاندا خزمەت بە دەزگا و دامەزراوە و سێکتەرە جیاوازەکان دەکەن، لەبەرامبەریشدا کونسڵی گشتی ژاپۆن لە هەرێم ئاماژەی بە گرنگی پێگەی هەرێمی کوردستان کرد لە ناوچەکە و رایگەیاند:" ژاپۆن بەگرنگییەوە دەڕوانێتە بارودۆخی ناوچەکە بەگشتی و هەرێمی کوردستان بەتایبەتی خوازیاری سەقامگیری سیاسی و ئاسایش و پێشکەوتنی ئابوری زیاترە لە ناوچەکە".

PUKMEDIA