سکاڵای دوو ژنی لەدادگای فیدراڵی کێشرایەوە

گووگڵ

یاسا

لەسەر داوایەکی قوباد تاڵەبانی پارێزەرێک سکاڵاکەی کە تایبەت بە نادەستوری یاسای فرەژنی و هێنانی ژنی دووەم پێشکەش بە دادگای باڵای فیدراڵی عیراق کردبوو کشاندەوە.

بەرهەم رەئوف عەلی، پارێزەری راوێژکار لە رونکردنەوەیەکدا کە کۆپیەکی بۆ وێبسایتی رەسمی یەکێتیی نیشتمانیی کوردستان PUKMEDIA نێردراوە رایگەیاند: "لە (17/3/2024) دوای ئەوەی داوایەكی یاساییم تۆماركرد لە دادگای باڵای فیدڕاڵی، تایبەت بە نادەستووری ماددەی (1) لە یاسای ژمارە (15)ی سالی (2008) پەرلەمانی كوردستان، پاش ئەوەی لە دادگای بالای فیدڕاڵی داواكەیان قبوڵ كرد، لە (12/5/2024) یەكەم دانیشتنی دادگا بەرێوەچوو، تیایدا بەندە تیانووسی خۆمم پێشكەشی سەرۆك و ئەندامانی دادگای ناوبراو كرد، ئەوەبوو دواتر دادگا بریاری دا بە دواخستنی دادبینی لە داواكەدا بۆ بەرواری (30/6/2024) بە مەبەستی ووردبینی و بریاردان لە داواكەدا".

"دوای ئەوە لە رۆژی (13/5/2024) قوباد تاڵەبانی، جێگری سەرۆكی حكومەتی هەرێمی كوردستان داوای كرد، كە واز لە داواكە بهێنم، ئەمەش بەهۆی زۆری نارەزایی رێكخراوەكان و نوێنەری وڵاتان لە هەرێمی كوردستان، بەندە لەبەر داواكاری جەنابی كاك (قوباد تاڵەبانی)  ئەمڕۆ (13/5/2024) هەستام بە پێشكەشكردن و بەرزكردنەوەی داواكاری پووچەڵكردنەوەی داواكە بۆ بەردەستی سەرۆك و ئەندامانی دادگای باڵای فیدڕاڵی"، بەرهەم رەئوف وای وت.

دوێنێ یەک شەممە دادگای باڵای فیدراڵی عیراق لەسەر سێ سكاڵاكەی تایبەت بە هەرێمی كوردستانی کۆبوەوەو هەرسێ سکاڵاکەی دواخست كە سكاڵای سێهەمیان لە دژی پێنج مەرجی ژنهێنانی دووەمە لە یاسای باری کەسێتی، کە لەدوای هەموارکردنی یاساکە لە پەرلەمانی کوردستان زیاد کراون و لەلایەن بەرهەم رەئوف عەلی پارێزەرەوە تۆماركراوە.

PUKMEDIA