سەعدی پیرە: داواکاری کاسبکارانی بازاڕی قەیسەری هەولێر رەوایە

نوسینگەی رۆژنامەوانی سەعدی ئەحمەد پیرە

سەردانی سەعدی پیرە بۆ بازاڕی قەیسەری هەولێر

سەعدی ئەحمەد پیرە وتەبێژی یەکێتیی نیشتمانیی كوردستان، بۆ گوێگرتن لە دوكاندار و كاسبكارانی بازاڕەکە و لەنزیکەوە بینینی زیانەکان، سەردانی بازاڕی قەیسەریی شاری هەولێری کرد و رایگەیاند:"لەگەڵ هەموو داوا ڕەواكانی خاوەن دوكان و كاسبكارەكانین و پێویستە پەلە بكرێت لە جێبەجێكردنی دووبارە نۆژەنكردنەوەی ئەو بازارە، بۆئەوەی كاسبكاران بەر لە جەژنی قوربان دەستبكەنەوە بە كار و پیشەی ڕۆژانەیان".

لەسەردانەکەیدا سەعدی ئەحمەد پیرە رایگەیاند: "بازاڕی قەیسەری شاری هەولێر جگەلەوەی سەنتەرێكی بازرگانی و شوێنی بژێوی هەزارەها كاسبكاری شارەكەیە، هاوكات بەشێكیشە لەكەلتور و كەلەپوری هەولێر، هەمیشە لەتەواوی جیهانەوە گەشتیاران كە دێنە هەولێر بەبێ سەردانیكردن و بینینی ئەو بازاڕە و شوێنە كەلتورییەكانی ناگەڕێنەوە، بۆیە بازاڕەکە بەشێكە لە مێژووی دانەبڕاوی هەولێر ، پێویستە لەسەر لایەنە پەیوەندیدارەكان بەشێوەیەكی جدی هۆكاری ئاگركەوتنەوەكە ئاشكرابكەن چونكە ئەم ڕووداوانە وایكردووە ئاستی متمانەی كاسبكاران بەرامبەر شوێنی كاركردن و ئاسایشی پاراستنی موڵك و ماڵ و سامانیان كەمببێتەوە".

راشیگەیاند:"لەسەر حكومەت و لایەنە پەیوەندیدارەكان پێویستە بە زووترین كات قەرەبووی زیان لێكەوتووان بكەنەوە و هەموو پێداویستی و خزمەتگوزارییەكانیان بۆ دابین بكەن، لەبابەتی ئەمنیەتی بازاڕەكە و كارەبا و سیستەمێكی كارای ئاگركوژێنەوە كە دلنیایی بداتە خاوەنكار و كاسبكارەكان، تاوەکو جارێكی تر ڕووداوی لەم شێوەیە روونەداتەوە بەمەش دەتواندرێت ئەو متمانەیە بگێڕدرێتەوە لە نێوان هاووڵاتیان و حكومەت بۆ ئەوەی دڵنیابن لە ئاسایشی موڵك و سەروەت و سامان و شوێنی كارەكانیان". 

هەر لەسەردانەکەیدا وتەبیژی یەکێتی رایگەیاند:"پێویستە پەلە بكرێت لە جێبەجێكردنی دووبارە نۆژەنكردنەوەی ئەو بازارە، بۆئەوەی كاسبكاران بەر لە جەژنی قوربان دەستبكەنەوە بە كار و پیشەی ڕۆژانەیان بەڵكو ئەو دەرفەتە لەدەست نەدەن كە ڕۆژانی پێش جەژن ڕۆژانی پڕ جوڵەی بازرگانیە و ئێمە لەگەڵ هەموو داوا ڕەواكانی خاوەن دوكان و كاسبكارەكانین".

PUKMEDIA